Սահմանադրական դատարանի շուրջ կրքերը շարունակվում են բորբոքվել: Արդյո՞ք կարելի էր խուսափել այս իրավիճակից, եթե այլ գործողություններ իրականացվեին: «Առաջին լրատվական»-ի հետ զրույցում ԱԺ փոխնախագահ Վահե Էնֆիաջյանը, այս հարցին ի պատասախան, նշեց, որ մինչև այս նախաձեռնություններով հանդես գալը, մինչև գործընթացը սկսելը կարելի էր քննարկում իրականացնել խորհրդարանական մյուս ուժերի ներկայացուցիչների, նաև անկախ պատգամավորի հետ, որից հետո ավելի ծանրակշիռ մոտեցում ցուցաբերել նախաձեռնվող քայլերին, և ակնկալվող արդյունքներն ավելի տրմաբանաված կլինեին»: Պատգամավորի խոսքով՝ քննարկում տեղի է ունեցել լիագումար նիստին, աշխատանքային քննարկում տեղի չի ունեցել: «ԲՀԿ-ն ճիշտ է վարվել ՍԴ հարցում. սա փակուղի տանող ճանապարհ էր»,- ընդգծեց ԱԺ փոխնախագահը՝ հավելելով, որ այդ գործընթացը քաղաքական էր և իրավական հիմք չուներ:
Հատուկ քննչական ծառայությունը հաղորդագրություն է տարածել այն մասին, որ Ազգային ժողովի պատգամավոր Արման Բաբաջանյանի հաղորդման հիման վրա քրեական գործ է հարուցվել իշխանությունը յուրացնելու առերևույթ հանցագործության դեպքի առթիվ: Վահե Էնֆիաջյանի գնահատմամբ՝ շատ կարևոր է, որ արդեն գործընթացն իրավական հարթությունում է: «Այո՛, պետք է ամբողջությամբ քննվի և բոլոր հնարավոր գործիքակազմով բոլոր գործառույթներն իրականացվեն»:
Վահե Էնֆիաջյանի հիշեցրեց, որ ժամանակին «Ծառուկյան» դաշինքը դեմ է քվեարկել Հրայր Թովմասյանի թեկնածությանը: Նա նաև հավելեց, որ արդարությունը վերականգնելու համար պետք է գործել բացառապես օրենքի տառին համապատասխան:
ԱԺ փոխնախագահը, ի թիվս այլ հարցերի, անդրադարձավ նաև Արցախի հարցի վերաբերյալ հնչող հայտարարություններին:
Մանրամասն՝ տեսանյութում: