Արցախի ինքնապաշտպանության ուժերի առաջին հրամանատար Արկադի Կարապետյանը կարծում է, որ Արցախի անվտանգության խորհրդի նախկին քարտուղար Վիտալի Բալասանյանը սպառնալիք է Հայաստան-Արցախ միասնության համար և Հայաստանի վարչապետ Նիկոլ Փաշինյանին ուղղված Բալասանյանի վերջին հայտարարությունները պետք է դիտարկել հենց այդ համատեքստում: Արկադի Կարապետյանի խոսքերով՝ Հայաստանի իշխանություններին ուղղված նման կոշտ գնահատականները ընդհուպ մինչև ֆիզիկական ոչնչացման սպառնալիք պարունակող հայտարարություններն երբևէ չեն կարող բխել երկու եղբայրական ժողովուրդների ընդհանուր շահերից:
«Մեր յուրաքանչյուր քայլ՝ թե Արցախո՛ւմ, թե Հայաստանո՛ւմ պետք է ուղղված լինի մեր միասնականությանը: Բոլորը խոսում են դրա մասին, սակայն առանձին դեպքերում տեսնում ենք, որ ոմանց համար այդ միասնականությունը լոկ բառեր են, այլ ոչ թե գաղափարախոսություն, այսինքն՝ որևէ հանրային անձ, որևէ քաղաքական գործիչ, երբ ասում է Հայաստան-Արցախ-Սփյուռք եռամիասնություն, Հայաստան-Արցախ մեկ հայրենիք, ապա պետք է գիտակցի այդ բառերի արժեքը, հայտարարություն անելիս մտածի, թե իր այդ ասածները մեր միասնականությանը նպաստո՞ւմ է, թե՞ ոչ : Հենց դրանից էլ կարող ենք եզրակացնել՝ տվյալ անձն ինչ նպատակներ է հետապնդում: Հիմա այս ամբողջ ասածիս վառ օրինակը Վիտալի Բալասանյանն է. նա ինչ խոսում է, ուրեմն այդպես էլ մտածում է, բայց ինքը, փաստորեն, իմ համոզմամբ՝ սադրում է», – «Առաջին լրատվական»-ի հետ զրույցում շեշտեց Արկադի Կարապետյանը:
Այս համատեքստում վերջինս հավելեց նաև.«Բալասանյանի այսօրվա ստատուսը ակտիվիստի ստատուս է և նա այսօրվա դրությամբ ոչ իշխանություն ունի, ոչ էլ այլ բան, սակայն, այդուհանդերձ, նման հայտարարություններով նա փորձում է խաթարել մեր միասնությունը, պառակտում մտցնել»:
Մեր զրուցակիցը չի կիսում նաև Վիտալի Բալասանյանի այն տեսակետը, թե Հայաստանի ներկայիս իշխանությունները կարող են դավաճանական քայլերի դիմել, մասնավորապես պայմանավորվել Ալիևի հետ՝ Արցախի ազատագրված տարածքները Ադրբեջանին հանձնելու շուրջ:
«Եթե Բալասանյանը նման տեղեկություններ ունի, ուրեմն թող հրապարակի, որ մենք էլ տեսնենք՝ ինչ պիտի անենք, բայց Նիկոլ Փաշինյանի կողմից ես դեռևս նման քաղաքականություն չեմ տեսել»,- եզրափակեց Արկադի Կարապետյանը:
Մանրամասները՝ տեսանյութում: