Ռուսական ՅՈւԿՈՍ նավթային ընկերության նախկին ղեկավարի անձնական էջն արգելափակվել է: Այս մասին հաղորդել է արդեն երկար տարիներ բանտում գտնվող գործարարի պաշտոնական կայքը: Սոցիալական այդ ցանցի ղեկավարությունը այդ քայլին դիմել է առանց դրա մասին տեղեկացնելու: Ըստ գործարարի կայքի` դեռ չի հաջողվում վերականգնել այդ էջը: Այդ էջը բացվել էր դեռեւս անցած տարի ապրիլ ամսին` Խոդորկովսկու դեմ սկսված երկրորդ դատավարությունից առաջ: Էջը վարում էր գործարարի մամուլի կենտրոնը: Facebook-ի ղեկավարությունը հայտնել է, որ ընկերությունը ստուգում է անձնական էջի պատկանելությունը, եւ դրա արգելափակումը բացատրել է հենց դրանով: Սակայն տարօրինակն այն է, որ անձնական էջն արգելափակվում է այն ժամանակ, եթե անձը դիմում է Facebook-ին` հայտնելով, որ իր անունից օգտագործվում է մի էջ, որն իրեն չի պատկանում: Այս դեպքում Խոդորկովսկին ոչ մի նամակ չի հղել սոցիալական այդ կայքին, քանի որ, ըստ ռուս գործարարի մամուլի կենտրոնի` Խոդորկովսկին տեղյակ է եղել, որ իր անձնական էջը կառավարվում է հենց իր վստահված անձանց կողմից: Այս պահին Խոդորկովսկու էջը բաց է, սակայն այն չի կառավարվում նրա մամուլի կենտրոնի կողմից, ինչպես նաեւ հնարավոր չէ հրապարակել էջում:
Հիշեցնենք նաեւ, որ դեկտեմբերի 15-ին դատարանը պատրաստվում է հրապարակել Խոդորկովսկու եւ Լեբեդեւի գործով երկրորդ դատական որոշումը: Դատախազությունը պահանջել է 14 տարի ազատազրկում երկու գործարարների համար: