Հատուկ քննչական ծառայությունը հաղորդագրություն է տարածել այն մասին, որ Ազգային ժողովի պատգամավոր Արման Բաբաջանյանի հաղորդման հիման վրա քրեական գործ է հարուցվել իշխանությունը յուրացնելու առերևույթ հանցագործության դեպքի առթիվ: «ԱԺ պատգամավոր Արման Բաբաջանյանի կողմից Հայաստանի գլխավոր դատախազին հաղորդում է ներկայացվել մի խումբ պաշտոնատար անձանց կողմից պետական իշխանությունը յուրացնելու առերևույթ հանցագործության դեպքի կապակցությամբ: Հաղորդման հիման վրա ՀՀ հատուկ քննչական ծառայությունում նախապատրաստված նյութերով որոշում է կայացվել ՀՀ քրեական օրենսգրքի 300-րդ հոդվածի 1-ին մասով քրեական գործ հարուցելու մասին: Կատարվում է նախաքննություն»,- ասված է ՀՔԾ տարածած հաղորդագրությունում:
Թեմայի շուրջ «Առաջին լրատվական»-ի հետ քննարկմանը մասնակցեցին քաղաքագետ Ստեփան Սաֆարյանը, վերլուծաբան Դավիթ Հովհաննիսյանը և «Քաղաքացու որոշում» կուսակցության անդամ Գարեգին Միսկարյանը:
Գ. Միսկարյանի խոսքով՝ ի սկզբանե, երբ ԱԺ-ն դիմում ուղարկեց ՍԴ՝ Հրայր Թովմասյանի լիազորությունները դադարեցնելու վերաբերյալ հարցը քննելու, շատ փորձագետներ նշում էին, որ ավելի լուրջ և կուռ հիմքեր կան այդ թնջուկը լուծելու: «Ըստ էության՝ կատարվել է հանցագործություն, և այդ հանցագործության դեպքով քննությունը, կարծում եմ, կարող է նպաստել ՍԴ թնջուկի լուծմանը»,- նշեց Գ. Միսկարյանը՝ հավելելով, որ Սահմանադրական դատարանը պետք է ցրել:
Ստեփան Սաֆարյանի դիտարկմամբ՝ անհրաժեշտ է, որ իշխող քաղաքական ուժը անցյալին քաղաքական գնահատական տա: «Անցյալում տեղի է ունեցել իշխանության զավթում, որին պետք է տալ քաղաքական գնահատական: Այն, ինչ արել է պատգամավոր Արման Բաբաջանյանը, այս համատեքստում է»,- նշեց քաղաքագետը՝ հավելելով, որ իշխանությանը վերատիրանալու մտադրություններն ակնհայտ էին, և պետության զավթման մի օղակն է եղել ՍԴ նախագահի պաշտոնում Հրայր Թովմասյանի ընտրությունը. նա ՍԴ անդամ է դարձել օրենքի պահանջների հակասությամբ:
«Միայն 2013թ-ի գազային պայմանագրերը բավարար են ՍԴ այն ժամանակվա բոլոր անդամներին դատելու համար, որոնք գործել են ՀՀ անկախության ու ինքնիշխանության դեմ և ոտնահարել են ՀՀ քաղաքացիների շահերը»,- ընդգծեց Ս. Սաֆարյանը: Նա նաև նկատեց, որ ՍԴ-ն հակաօրինական որոշումներ է կայացրել նաև՝ կապված Ռ. Քոչարյանի դիմումի հետ:
Դավիթ Հովհաննիսյանի կարծիքով՝ Սահմանադրական դատարանի ճգնաժամի լուծման համար ԱԺ ընտրած ճանապարհը ոչ համարժեք ճանապարհ է. «Այն պատգամավորը, ում միտքն է եղել ՍԴ հարցը լուծել այս ճանապարհով, պետք է պատասխանատվության ենթարկվի… Այդ ճանապարհն արդյունավետ կլիներ, եթե ՍԴ-ում բոլորն անկախ դատավորներ լինեին և միայն Հրայր Թովմասյանը, ուղղորդվելով նախկին իշխանությունների կողմից, ինքնագործունեությամբ զբաղվեր, և ՍԴ-ին հնարավորություն տրվեր ինքնամաքրվել: Բայց ակնհայտ է, որ այդպես չէ: ՍԴ-ն գրեթե ամբողջությամբ ծառայում է նախկին ռեժիմին՝ Քոչարյան-Սարգսյան դաշինքին»:
Մանրամասն՝ տեսանյութում:
