Ազգային ժողովի պատգամավոր Արման Բաբաջանյանի հաղորդման հիման վրա քրեական գործ է հարուցվել Հրայր Թովմասյանի կողմից իշխանությունը յուրացնելու առերևույթ հանցագործության դեպքի առթիվ: Թեմայի շուրջ զրուցելու համար «Առաջին լրատվական»-ը հյուրընկալել է փաստաբան Կարապետ Բադալյանին:
Այս առնչությամբ մեր զրուցակիցը կարծում է, որ շատ ավելի լավ կլիներ, եթե քրեական գործ հարուցելու այս հարցը դեռևս մեկ տարի առաջ լուծվեր, երբ այս խնդիրները բարձրացվում էին. «Այս տեղեկությունները շատ հստակ, համոզիչ կերպով հրապարակվել էին մամուլի միջոցներով, և չպետք է իրավապահ մարմինները սպասեին, որ ԱԺ պատգամավորը ներկայացներ դիմումը, որպեսզի քրեական գործ հարուցեին: Իմ կարծիքով՝ այստեղ ակնհայտ էր, որ քրեական գործ հարուցելու և քննելու անհրաժեշտություն կա»:
Փաստաբանի խոսքով՝ սրա արդյունքը պետք է այն լինի, որ նրանք, ովքեր յուրացրել էին իշխանությունը, պետք է քրեական պատասխանատվության ենթարկվեն:
Իսկ Ազգային ժողովի կողմից նախաձեռնված գործընթացը Կարապետ Բադալյանը իհարկե համարում է օրենքի շրջանակներում, բայց նաև դրա հետևանքը կարող էր լինել այն, որ դրանով ԱԺ-ն լեգիտիմացներ ՍԴ անդամներին. «Շատ լավ էր, որ այդ շանսը Սահմանադրական դատարանի անդամները չօգտագործեցին. նրանք կարող էին վարույթ ընդունել այդ դիմումը, մեկամսյա ժամկետում մանրամասն քննեին և հետո իրենց հիմնավորված որոշմամբ մերժեին՝ դրանով իրենք իրենց ավելի լեգիտիմացնելով: Դիմումը վարույթ չընդունելով՝ նրանք ցույց տվեցին, որ իրենք այդ լիազորությունները իրականում չունեն»:
Փաստաբանի կարծիքով՝ այս քրեական գործը կարող են մեկնաբանել որպես անձի նկատմամբ հետապնդում. «Սակայն քրեական գործի քննությամբ և դատական ակտերով հստակ կլինի, որ Հրայր Թովմասյանը և նրա հետ կապակցված անձինք իրոք քրեորեն հետապնդելի արարք են կատարել, բայց շատ ավելի լավ կլինի, որ սա որպես քաղաքական պրոցեսի լուծում լինի՝ ոչ թե քրեական գործերի միջոցով, այլ հենց քաղաքական որոշմամբ ԱԺ-ն կարող է օրենք ընդունել և փոփոխություն կատարել Սահմանադրության 213-րդ հոդվածում»:
Հարցազրույցն ամբողջությամբ՝ տեսանյութում: