ԱԺ պատգամավոր Արման Բաբաջանյանը ֆեյսբուքյան իր էջում գրել է․
ՍԴ-ի շուրջ ճգնաժամն անպայման կհանգուցալուծվի: Բայց մեր երկրում կարևոր և առանցքային այլ անելիքներ կան, որոնց պետք է ձեռնամուխ լինել:
Այսօր պաշտոնապես դիմել եմ Ազգային ժողովի նախագահ Արարատ Միրզոյանին՝ առաջարկելով ստեղծել աշխատանքային խումբ, որը կգործի մշտական հիմունքներով և կզբաղվի Ղարաբաղյան հակամարտության կարգավորման գործընթացին առնչվող խնդիրներով: Աշխատանքային խմբում կընդգրկվեն ԱԺ արտաքին հարաբերությունների, պաշտպանության և անվտանգության հարցերի հանձնաժողովների անդամներ, ԱԳՆ ներկայացուցիչ կամ ներկայացուցիչներ, ինչպես նաև հրավիրյալ հայ և արտերկրյա փորձագետներ: Աշխատանքային խումբը պարբերաբար հանդես կգա զեկույցներով, վերլուծություններով և երաշխավորություններով, որոնք կամրապնդեն հայկական կողմի դիրքերը բանակցային գործընթացում: Աշխատանքային խմբի գործունեության մյուս ուղղությունը կլինի խորհրդարանական դիվանագիտության հարթությունում Ղարաբաղյան հակամարտությանն առնչվող աշխատանքը, միասնական ու համակարգված մոտեցումների մշակումը:
Ղարաբաղյան հակամարտության վերաբերյալ իր հայտարարություններից մեկում վարչապետ Նիկոլ Փաշինյանը նշել էր, որ բանակցային գործընթացին տիրապետում են չափազանց փոքր թվով պաշտոնյաներ, ինչը բացասական երևույթ է, և որ բանակցային գործընթացին տիրապետողների շրջանակը պետք է ընդլայնվի: Նշված առաջարկությունն ամբողջությամբ տեղավորվում է այդ տրամաբանության մեջ և իրականացման դեպքում կարող է էապես ամրացնել հայկական կողմի դիրքերը բանակցային գործընթացում:
Նշված առաջարկության վերաբերյալ խորհրդարանի ղեկավարության պատասխանը կներկայացնեմ հաջորդիվ:
https://www.facebook.com/babajanyana/posts/2779063942124315?__xts__[0]=68.ARASJsYkC_r_E8gkZlRq85Ta3KMZ92LRrkWOZLVo9U0V9FOX4HXHuUizYWjvk11_nSb_L-FLArXRqC9L-2BNVKcsD80vEsDdsX8OUtTvqpLLn7wacPoAkkNG2CaGAQWnfHQomfeJI2SExh52y2lE0a932Y24IwNmPssVTkAdSY1rVFehyMkTf4QB3auhUCWbKSVg0JqV_OPBVo2FMeMvHqVzEwQ_HDdoxTm0S879_w6oGzMNelo1YU6nU1ocS6_8NFxpRkpvkp-0qCRPM5ZSQq3Iw6PgFKuta56XQ4VAwpmqumn_U_fQDTXE0sul0ttdiTX8ohaJf2CvyLsyEKEGOsoIkqnjzI3EIBJEkENvHdLCnST7CAp_I1AnpA&__tn__=-R