«Մեկ է, ես չեմ հավատում։ Մինչև պայմանագիրը չստորագրվի, չեմ հավատալու։ Ստորագրվելուց հետո էլ կարող են մի շարք խնդիրներ ու ռիսկեր առաջ գալ։ Սկզբում «Պոբեդա»-ի պես դեմպինգ կանեն, հետո նորից գները բարձրացնեն։ «Պոբեդան» հենց էդպես էլ վարվեց։ Իմաստը ո՞րն է»,- «Առաջին լրատվական»-ի հետ զրույցում ասաց քաղավիացիայի նախկին պետ Շահեն Պետրոսյանը՝ անդրադառնալով իռլանդական լոուքոսթեր՝ Ryanair ընկերության հետ ՀՀ կառավարության ձեռք բերած պայմանավորվածությանը։
ՀՀ կառավարությունից, հիշեցնենք, երեկ տեղեկացրին, որ իռլանդական Ryanair ընկերությունը 2020-ի հունվարից թռիչքներ կիրականացնի Երևանից Հռոմ և Միլան, ամռանը՝ Բեռլին, իսկ Գյումրիի օդանավակայանից՝ Մեմմինգեն: Տոմսերի միջին արժեքը կկազմի 35 եվրո: «Հայաստանն այսօր դառնում է Ryanair-ի ցանցի 40-րդ երկիրը։ Մենք այսօր այստեղ ենք՝ հայտարարելու նոր ուղղություններ՝ Երևանից Հռոմ, Միլան, որոնք կմեկնարկեն հունվարից, Բեռլին՝ 2020-ի ամռանից։ Եվ, թերևս, առաջին եվրոպական ուղղությունը Գյումրիից դեպի Մյունխեն, կրկին 2020-ի ամռանից»,- այսօր այս մասին մամուլի ասուլիսի ժամանակ ասաց Ryanair իռլանդական բյուջետային ավիաընկերության կոմերցիոն ղեկավար Դեյվիդ Օ՛Բրայանը։
«Նորից առ ոչինչ են դառնում սեփական ավիաընկերություն ունենալու նախադրյալները։ Նորից մենք ընկնում ենք երրորդական պլան, երրորդական երկրների շարք, որոնք չունեն սեփական ավիաընկերություն»,- ասաց Պետրոսյանը՝ հավելելով, որ լոուքոսթերներն այդքան էլ հուսալի չեն։ Նրանք կարող է ինչ-որ պահի սկսեն այլևս չթռնել, եթե իրենց պայմանները ձեռնտու չլինեն. «Լոուքոսթերների էժան գների պատճառով շատ հնարավոր է, որ, օրինակ, «Էյր Ֆրանսը» ուղևոր չունենալու պատճառով արդեն հրաժարվի թռնել այստեղից, ավստրալիական ավիաուղիները հրաժարվեն թռնել։ Ու ինչ կստացվի, եթե նման իրավիճակ ստեղծվի, ինչ ենք անելու։ Փաստի առաջ ենք կանգնելու։ Նման բացասական ռիսկեր կան։ Թող գան լոուքոսթերները թռնեն, բայց մենք էլ պետք է ավիափոխադրող ունենանք։ Բայց Հայաստանի կառավարությունը համառորեն չի ուզում գնալ դրան։ Տաթևիկ Ռևազյանը այն եռանդը, որը ներդրել էր այդ լոուքոսթերը Հայաստան բերելու համար, լավ կլիներ սեփական ավիաընկերություն ունենալու վրա ծախսեր»։
Քաղավիացիայի նախկին պետի խոսքերով՝ եթե անգամ վերջնական համաձայնություն էլ լինի, պայմանագրերը կնքվեն, ապա թռիչքները պետք է լինեն Գյումրիից, որ նաև Վրաստանից գան թռնեն։ «Մերոնք ոնց են հիմա գնում Քութաիս հասնում, որ էժան գնով թռնեն։ Հիմա եթե Գյումրիից լինեն թռիչքները, մարդիկ Վրաստանից էլ կգան կթռնեն։ Ես դրա կողմնակիցն եմ, որ «Զվարթնոց» օդանավակայանը մնա որպես միջազգային օդանավակայան և սպասարկի լուրջ ավիաընկերություններին։ Իսկ լոուքոսթերների համար երկրորդական օդանավակայան է պետք, որը կարող է լինել Գյումրին»,- ասաց մեր զրուցակիցը։
Իսկ ավելի լուրջ արդյունք ունենալու համար, Պետրոսյանի խոսքերով, վառելիքի և սպասարկման մենաշնորհները պետք է վերացնել: Օդանավակայանի գները պետք է նվազեցնել, քանի որ, Պետրոսյանի խոսքերով, լոուքոսթերներին ձեռնտու չէ ներկայիս գներով թռիչքներ իրականացնելը։
Հակառակ դեպքում, պետությունը պետք է սուբսիդիաներ տրամադրի՝ ինչպես Վրաստանում։ Սակայն Վրաստանը դա անում է տուրիզմը զարգացնելու համար, իսկ Հայաստանը, Պետրոսյանի խոսքերով, այդքան ինֆրաստրուկտուրաներ չունի։
Ամեն դեպքում, մինչ շատերը քննարկում են՝ իրատեսական է Ryanair-ի գալը Հայաստան, թե ոչ, արդեն իսկ ընկերությունը վաճառքի է հանել տոմսերը՝ եկող տարվա հունվարից սկսած։ Երևան-Հռոմ, Երևան-Միլան հետադարձով տոմսերը՝ միայն ձեռքի ուղեբեռով, 2020-ի հունվարի 15-ի համար արժե 56.48 եվրո: