Արցախի Ազգային անվտանգության խորհրդի նախկին քարտուղար, գեներալ Վիտալի Բալասանյանը Ստեփանակերտից հայտարարել է, որ Հայաստանի այսօրվա իշխանությունների վարած քաղաքականությունը Լևոն Տեր-Պետրոսյանի «Ղարաբաղը հանձնելու» քաղաքականության շարունակությունն է:
Այս առնչությամբ ՀԱԿ իրավական հանձնաժողովի ներկայացուցիչ Արմեն Խաչատրյանը «Առաջին լրատվական»-ի հետ զրույցում ասաց. «Եթե այդ տեղեկատվությունը ճիշտ է, ուրեմն Վիտալի Բալասանյանը նախ՝ ստախոս է, և երկրորդ՝ բացարձակ չի տիրապետում Ղարաբաղյան հարցի պատմությանը, ընթացքին: Ես չեմ ուզում փաստաբանի դեր կատարել, բայց ով ուսանողի մակարդակով տիրապետում է Ղարաբաղյան հարցի պատմությանը, առնվազն պիտի տեղյակ լինի, որ Լիսաբոնի գագաթնաժողովին միջազգային հանրության կողմից սեղանին դրված էր փաստաթուղթ, որը Լեռնային Ղարաբաղին տալիս էր ինքնավարության ստատուս Ադրբեջանի կազմում, և Լևոն Տեր-Պետրոսյանի վետոն էր, որ անհնարին դարձրեց դրա իրագործումը»:
Մեր զրուցակցի կարծիքով՝ Վիտալի Բալասանյանի դերակատարումը ուռճացվում է, քանի որ նա, ի թիվս մյուս հրամանատարների, պատերազմի ժամանակ եղել է սովորական հրամանատար. «Եվ այսօր իր ամբիցիան, թե ինքը «Ռեմբոյի» կինոյի նման միայնակ Արցախը ազատագրել է… մենք էլ տուրք ենք տալիս նրա ամբիցիաներին: Իմ կարծիքով՝ չարժե այդքան ուշադրություն դարձնել Վիտալի Բալասանյանին: Մանավանդ, որ պատկերը շատ տխուր է՝ գեներալը սկսել է սուտ խոսել, ինչը հարիր չէ իր ուսադիրներին»:
Նախկին քաղբանտարկյալ Գրիգոր Ոսկերչյանն էլ կարծում է, որ Վիտալի Բալասանյանի հարցազրույցին չարժեր նույնիսկ անդրադառնալ, քանի որ նա այնքան աբսուրդ բաներ է ասել. «Համենայնդեպս, իմ տպավորությունն այն է, որ ինչ-որ գավառամիտ անձնավորություն, որը միգուցե լավ հրամանատար է եղել… բայց եթե դաշտային հրամանատարը փորձում է մտնել քաղաքականություն, իսկ այս հարցազրույցով ինքն ապացուցեց, որ կիլոմետրերով հեռու է քաղաքականությունից, այսպիսի աբսուրդային իրավիճակ է ստեղծում»:
Գրիգոր Ոսկերչյանի խոսքով՝ Վիտալի Բալասանյանը նույնիսկ ռազմական գործիչ չէ, այլ միայն դաշտային հրամանատար. «Նա փորձում է ականջին հասած ինչ-որ կցկտուր լուրերով գլոբալ քաղաքական եզրակացությունների հանգել: Անկեղծ եմ ասում՝ շատ ծիծաղելի վիճակում է հայտնվել: Մեղք ենք մենք, որ Բալասանյանի նման անձը քաղաքական այդ բագաժով Արցախի նախագահի թեկնածու է: Զարմանում եմ նաև, թե ինչպես է նա տարիներ շարունակ Արցախի Ազգային անվտանգության խորհրդի քարտուղար աշխատել»:
Հաշվի առնելով Վիտալի Բալասանյանի հայտարարությունները նաև ՀՀ վարչապետի հասցեին՝ Արմեն Խաչատրյանը կարծում է, որ այստեղ անելիք ունեն ոչ թե իրավապահ մարմինները, այլ առողջապահության ոլորտի մասնագետները. «Եթե փորձեմ մեկ բառով ասել, ապա սա պրովոկացիա է, պրովոկացիա՝ պետության դեմ, իշխանության դեմ, Հայաստանի և Ղարաբաղի դեմ, բանակցային գործընթացի դեմ»:
Հարցազրույցն ամբողջությամբ՝ տեսանյութում: