ԱՄՆ կառավարությունը ուսումնասիրում է մոտ 50 B61 ջերմամիջուկային ռումբերը թուրքական Ինջիրլիք ավիաբազայից հանելու տարբերակները, որոնք, ըստ էության, «պատանդ» են մնացել Թուրքիայի նախագահ Ռեջեփ Թայիփ Էրդողանի մոտ: Այս մասին հայտնում է The New York Times-ը՝ վկայակոչելով պաշտոնյաների շրջանում աղբյուրներին:
Ինչպես նշել է պարբերականի զրուցակիցներից մեկը, նման ռումբերի տեղակայումը թուրք-սիրիական սահմանից ընդամենը 400 կմ հեռավորության վրա գտնվող բազայում, որտեղ ներկայումս ռազմական գործողություններ են ընթանում, սպառնում է ԱՄՆ-ի միջուկային անվտանգությանը:
Միևնույն ժամանակ, դրանց մեկ այլ վայր տեղափոխելու փորձը կարող է որպես Անկարայի և Վաշինգթոնի միջև դաշնակցային հարաբերությունների փաստացի խզում ընկալվել:
Միևնույն ժամանակ, գրում է The Drive-ը, Թուրքիայից ռումբերի տեղափոխումը ևս Միացյալ Նահանգների համար որոշակի դժվարությունների հետ է կապված: Դա հիմնականում պայմանավորված է ամերիկյան ցուցումներով, համաձայն որոնց միջուկային զինամթերքի տեղափոխումը կարող է իրականացվել բացառապես անվտանգության ուժեղացված միջոցառումների պայմաններում: Մասնավորապես, ԱՄՆ ռազմաօդային ուժերի հատուկ նշանակության ջոկատի C-17 Globemaster ռազմական տրանսպորտային ինքնաթիռներին, որոնք իրականացնում են նման ռումբերի տեղափոխումը, արգելվում է թռչել այն վայրերում, որտեղ «իրավիճակն անկայուն է»:
Պարբերականի տվյալների համաձայն, տեսականորեն հնարավորություն կա ռումբերը դուրս բերել հատուկ բեռնատարներով կամ տանել դեպի նավահանգիստ, որպեսզի հետագայում դրանք ծովային ճանապարհով տեղափոխվեն Թուրքիայից: Այնուամենայնիվ, նման որոշումները, նշում է Drive-ը, քիչ հավանական են, հաշվի առնելով Անկարայի և Վաշինգթոնի հարաբերությունների սառնությունը, ինչպես նաև տարածաշրջանում գործող զինյալների կողմից սպառնացող վտանգը:
