ՄԱԿ-ի գլխավոր քարտուղարի տեղակալ և զինաթափման հարցերով գերագույն ներկայացուցիչ Իդզումի Նակամիցուն հայտարարել է, որ աշխարհում իրավիճակ է ստեղծվել, որի պայմաններում աճում են միջուկային դիմակայության ռիսկերը: Այս մասին նա ասել է «Կոմերսանտ»-ին տված հարցազրույցում:
«Լուրջ մտավախություններ կան, որ իրավիճակը կրկին վտանգավոր է դառնում: Ես բազմաթիվ պատճառներ եմ տեսնում դրա համար»,- ասել է Նակամիցուն:
Նա նշել է, որ լրջորեն խախտվում է վստահությունը պետությունների, այդ թվում՝ միջուկային գերտերությունների միջև, և հիշեցրել է ՄԱԿ-ի գլխավոր քարտուղարի խոսքերն այն մասին, որ «աշխարհն այժմ անկարգությունների մեջ է գտնվում՝ վստահության բացակայության պատճառով»:
Նակամիցուն նաև փաստել է առաջատար տերությունների և այլ երկրների միջև երկխոսության անբավարարությունը: Գլխավոր քարտուղարի տեղակալ կարծում է, որ այժմ նրանք սկսում են ավելի շատ գնահատել ռազմական հնարավորությունները, քան դիվանագիտությունն ու բանակցությունները:
Նա շեշտել է, որ կան իրավիճակը բարդացնող շատ այլ գործոններ, ներառյալ աշխարհաքաղաքական գործոնը և գիտության ու նոր տեխնոլոգիաների արագ զարգացումը:
Այսպիսով, աշխարհն արդեն երկբևեռ չէ, իսկ կիբերտարածքում չարամիտ գործունեության հետևանքները, արհեստական բանականության օգտագործմամբ զենքի կիրառման հնարավոր հետևանքները լրացուցիչ ըմբռնում են պահանջում:
«Այլ կերպ ասած, կան բազմաթիվ գործոններ, որոնք մեծացնում են միջուկային դիմակայության սպառնալիքը: Բայց առավել սուր խնդիրը պետությունների միջև վստահության բացակայությունն է: Այլ գործոնները սրում են դա: Իրավիճակը շատ բարդ է»,- ասել է ՄԱԿ-ի գլխավոր քարտուղարի տեղակալը:
