Արցախում կայանալիք նախագահական ընտրություններում առաջադրվելու մասին նախնական կամ վերջնական ձևով հայտնել է յոթ գործիչ՝ Արցախի նախկին վարչապետ Արայիկ Հարությունյանը, արտգործնախարար Մասիս Մայիլյանը, անվտանգության խորհրդի նախկին քարտուղար Վիտալի Բալասանյանը, ԱԺ նախագահ Աշոտ Ղուլյանը, «Արցախի վերածնունդ» կուսակցության ղեկավար Հայկ Խանումյանը, պատգամավոր Ռուսլան Իսրայելյանը և նախկին պատգամավոր Վահան Բադասյանը: Այս ցանկում հատկանշականն այն է, որ ֆավորիտները ներկայացնում են գործող իշխանությունը:
Թեմայի շուրջ «Առաջին լրատվական»-ի հետ քննարկմանը մասնակցեցին քաղաքագետ Գոռ Հակոբյանը, Գերագույն խորհրդի նախկին պատգամավոր Ազատ Արշակյանը և վերլուծաբան Գոռ Մադոյանը:
Ազատ Արշակյանի դիտարկմամբ՝ կարևոր է, որ թեկնածուները փորձառու գործիչներ են. «Լավ է, որ ուսանողական լսրանից կամ գործազուրկների հերթից որևէ մեկը դուրս չի եկել ու ներկայացրել իր թեկնածությունը այդ պաշտոնի համար»: Նրա կարծիքով՝ Արցախի նախագահի այս ընտրությունները տարբերվելու են նրանով, որ ձևական չեն լինելու, այլ մրցակցային. նախապես հայտնի չէ, թե ով է հաղթելու:
«Վիտալի Բալասանյանին ես ֆավորիտ չէի համարի: ֆավորիտները առնվազն ավելի զուսպ և կշռադատված հայտարարություններ են անում, օրինակ՝ Արայիկ Հարությունյանը կամ Մասիս Մայիլյանը»,- նշեց Գոռ Մադոյանը՝ կարևորելով, որ այս ընտրությունները կանխատեսելի չեն, ինչը դրական է: Վելուծաբանի դիտարկմամբ՝ Հայաստանի նախկին իշխանությունները որոշակի լծակներ դեռևս ունեն. «Դա երևում է նաև Վիտալի Բալասանյանի սուր, բայց ժամանակավրեպ հայտարարություններից, որոնցից տխրության հոտ է գալիս… Այդ հայտարարություններն իրենը չեն, դրանք ավելի շատ ռևանշիստական տրամաբանության մեջ են»:
Գոռ Հակոբյանի կարծիքով՝ այս անգամ Արցախում կայանալիք ընտրությունները չեն ընթանա ճնշումներով, արդյունքում հնարավորություն կլինի Արցախում հաստատել նոր որակի իշխանություն և նախկին իշխանությանը զրկել այնտեղ ունեցած իրենց ազդեցությունից:
Անդրադառնալով Վիտալի Բալասանյանի հայտարարություններին՝ Ազատ Արշակյանը կարծիք հայտնեց, որ գործ ունենք ինքնավնասարարության հետ. «Ինչպես որ զինվորականը կրակում էր իր ոտքին, ճիշտ այդպես էլ Վ. Բալասանյանն ինքն իրեն զրպարտում է, ոչ միայն Արցախի և ՀՀ քաղաքացիներին, այլ հենց ինքն իրեն է զրպարտում և իր կենսագրությունն է հիմա պսակազերծում: Սա ինքնավնասարարություն է՝ «սամաստրել», և դա ցավալի է…»:
Մանրամասն՝ տեսանյութում: