«Սանիթեք» ընկերությունը վերջնական հայտարարեց՝ դիմում են արբիտրաժային դատարան։ Երեկ ընկերության տնօրինությունը տեղեկացրեց, որ «Սանիթեքը» սկսել է միջազգային արբիտրաժային դատարան դիմելու գործընթացը: «Հարգելի՛ գործընկերներ, սիրելի՛ երևանցիներ, «Սանիթեք» ընկերությունը սկսել է միջազգային արբիտրաժային դատարան դիմելու գործընթացը: Եվ որպես այդ գործընթացի առաջին քայլ, ընկերության բաժնետերը՝ Նիկոլաս էլ Թավիլը, գործելով նաև մյուս բաժնետերերի անունից, ծանուցել է Հայաստանի Հանրապետության կառավարությանը և Երևանի քաղաքապետարանին ներդրումային վեճի առկայության վերաբերյալ»,- ասված է ընկերության հաղորդագրությունում:
Երևանի քաղաքապետարանն էլ՝ սկսած քաղաքապետ Հայկ Մարությանից, վերջացրած ավագանու անդամներով, մի քանի անգամ արդեն հայտարարել են, որ քաղաքապետարանն այս դեպքում «մտածելու բան չունի»։
Քաղաքապետի խորհրդական Կարեն Համբարձումյանն «Առաջին լրատվական»-ի հետ զրույցում նախօրեին ասաց, որ Երևանի քաղաքապետարանին որևէ արբիտրաժով սպառնալ հնարավոր չէ, քանի որ քաղաքապետարանը գործել է օրենքի տառին համապատասխան։ «Եթե «Սանիթեքը» դիմի արբիտրաժ, ապա մենք չենք կարող ասել, թե ինչ գումարների մասին կարող է խոսք գնալ։ Բայց մեզ համար մտահոգիչ չէ արբիտրաժ դիմելու սպառնալիքը, որովհետև մենք գործել ենք գործող օրենսդրության տառին և ոգուն համապատասխան, և մեր բերած փաստական հանգամանքները և իրավական հիմնավորումները առավել քան բավարար են թե՛ տեղական և թե՛ միջազգային դատարանի համար մեր օգտին հանգուցալուծում ստանալու»,- ասաց Համբարձումյանը։
Մեր դիտարկմանը՝ «Սանիթեքը» պնդում է, թե քաղաքապետարանը միտումնավոր խոչընդոտներ է ստեղծել բիզնեսի համար, քաղաքապետի խորհրդականը հակադարձեց. «Մենք պարզապես սկսել ենք ինքներս քաղաքի աղբը հավաքել։ Եթե դա խոչընդոտ է, ապա կներեք, բայց մենք չէինք կարող քաղաքում աղբը թողնել կուտակված։ Մենք այս առումով որևէ մտահոգություն չունենք։ Մենք սպասում ենք և պատրաստ ենք իրադարձությունների ցանկացած զարգացման»։
Երևանի քաղաքապետի մամուլի խոսնակ Հակոբ Կարապետյանն էլ «Առաջին լրատվական»-ի հետ զրույցում ընդգծեց, որ քաղաքապետարանի բոլոր գործողությունները հիմնված են եղել օրինականության, օրենսդրության և պայմանագրի դրույթների հիման վրա։ «Մեր յուրաքանչյուր գործողություն հիմնված է փաստական տեղեկատվության հիման վրա։ Քաղաքապետն էլ, պայմանագիրը խզելու վերաբերյալ հայտարարության ժամանակ, շատ մանրամասն, մասնագիտական ուսումնասիրության հիման վրա է որոշում կայացրել»,- ասաց Կարապետյանը՝ հավելելով, որ իրենք պատրաստ են արբիտրաժային գործընթացին։ «Քաղաքապետարանը գնացել է պայմանագրի խզման՝ հաշվարկելով նաև հետագա զարգացումները։ Քաղաքապետարանը պատրաստ է այս գործընթացին»,- ընդգծեց քաղաքապետի խոսնակը։
Երևանի ավագանու ընդդիմադիր խմբակցության ղեկավար Դավիթ Խաժակյանը, «Առաջին լրատվական»-ի հետ զրույցում անդրադառնալով «Սանիթեքի»՝ արբիտրաժ դիմելուն, նկատեց, որ թեև պետք է սպասել, որ ընկերությունը ներկայացնի արբիտրաժային դատարան դիմելու հիմքերը, ինչպես նաև պարզ դառնա՝ վարույթ կընդունվի՞ այդ բողոքը, թե՞ ոչ։ Ամեն դեպքում, եթե համադրենք այն փաստարկները, որը ներկայացնում էր «Սանիթեքը», ապա դա վերաբերելու է իր կատարած ներդրումների վնասմանը։ Մասնավորապես, մեքենաների վնասմանը և աղբամանների վնասմանը փողոցներում։ «Քանի որ քաղաքը պայմանագրային հստակ պարտավորություններ չուներ, որ աղբավայրը պետք է լիներ այս կամ այն տիպի, և «Սանիթեքը» շահագործումն իրականացրել է և մրցույթը հաղթել է այն պայմաններում, որոնք կան առ այսօր, ես գտնում եմ, որ արբիտրաժ դիմելու հիմքերը խարխուլ են։ Ամեն դեպքում քաղաքապետարանը պետք է պատրաստվի դրան, ուսումնասիրի հիմքերը, քանի որ, իմ ունեցած տեղեկություններով՝ դա իրականացվելու է Հայաստանի և Լիբանանի միջև եղած ներդրումների խրախուսման վերաբերյալ պայմանագրով, որում նշված է, որ վեճը կարող է քննվել կամ միջազգային տնտեսական դատարանում կամ արբիտրաժային դատարանում։ Երկուսն էլ բավականաչափ ծախսատար են լինելու, և կարծում եմ, որ քաղաքապետարանն այս գործընթացին չպետք է մատների արանքով նայի և պետք է շատ լավ պատրաստվի»,- ընդգծեց Խաժակյանը։
Ավագանու ընդդիմադիր անդամի խոսքերով՝ արբիտրաժային գործընթացը ցանկալի պրոցես չէ և չի կարելի ասել, որ նման պրոցեսները կարող են ազդել Հայաստանի ներդրումային գրավչության վրա։ Հայաստանում ներդրում կատարողը պետք է նայի վեճի էության վրա։ «Բայց ցանկալի է, որ Հայաստանը խուսափի նման գործընթացներից»,- եզրափակեց Խաժակյանը։
