ԱԺ պատգամավոր Արման Բաբաջանյանը ֆեյսբուքյան իր էջում գրել է. Վարչապետ Նիկոլ Փաշինյանի հրավերով այսօր պաշտոնական այցով Հայաստան է ժամանել Վրաստանի նորանշանակ վարչապետ Գեորգի Գախարիան: Սա նրա առաջին այցն է Հայաստան՝ կառավարության ղեկավարի պաշտոնում, մինչդեռ այլ պաշտոններում Գախարիան նախկինում եղել է Հայաստանում՝ 2017 թվականի հունիսին նա Երևան է այցելել Վրաստանի էկոնոմիկայի նախարարի, իսկ 2018 թվականի փետրվարին` ՆԳՆ ղեկավարի պաշտոնում։
Վրաստանի վարչապետի պաշտոնում Գախարիան իր առաջին այցը կատարել էր Ադրբեջան, և միայն Հայաստան ու Թուրքիա այցերից հետո է նախատեսվում նրա այցելությունը Բրյուսել:
Վրաստանի նորանշանակ վարչապետի այցերի այս աշխարհագրությունը վկայում է առաջին հերթին տարածաշրջանային գերակայությունները կարևորելու հարևան երկրի ղեկավարության քաղաքական դիրքորոշման մասին:
Իրականում դա ռեալ-պոլիտիկի ուղղակի դրսևորում է, քանի որ մեր տարածաշրջանն այս օրերին գտնվում է դրամատիկ իրադարձությունների հորձանուտում, ռեգիոնալ նոր խաղացողներով տարածաշրջանային քաղաքական քարտեզի վերաձևման նախաշեմին: Այս իրողությունները, սակայն, չպետք է ստվերեն Վրաստանի հետ մեր երկկողմ հարաբերությունների կարևորությունն ու ռազմավարական նշանակությունը:
Վրաստանը մեզ համար հարևան և բարեկամ պետություն է, որի հետ մենք կապված ենք ոչ միայն պատմականորեն, այլև ներկայիս աշխարհաքաղաքական ու տարածաշրջանային զարգացումների թելադրանքով: Չնայած արտաքին քաղաքական ու անվտանգային նախընտրությունների տարբերությանը՝ Հայաստանն ու Վրաստանն ունեն փոխպայմանավորող ու փոխլրացնող օբյեկտիվ շահեր, որոնք մեր հարաբերությունների որակը դարձնում են ռազմավարական, անգամ եթե դա չի հայտարարվում արարողակարգով:
Վրաստանը Եվրամիության հետ ասոցացված պետություն է, ձգտում է դեպի ՆԱՏՕ, և կախված աշխարհաքաղաքական զարգացումներից, տեսանելի ապագայում կարող է ինտեգրվել Հյուսիսատլանտյան դաշինքին՝ ընդհուպ մինչև լիիրավ անդամություն:
Այսինքն՝ առաջիկայում մեծ է հավանականությունը, որ ՆԱՏՕ-ն ներկայացված կլինի նաև մեր հարևան ու բարեկամ այդ երկրում: Մեզ համար դա չափազանց կարևոր, կենսական նշանակություն ունի, քանի որ դա լրացուցիչ զսպող գործոն կդառնա տարածաշրջանում ռուսական ռազմական ներկայության առումով:
Վրաստանի եվրաինտեգրումն ու անդամակցությունը ՆԱՏՕ-ին ամբողջությամբ բխում են Հայաստանի շահերից, քանի որ այդ գործընթացների արդյունքում մենք կունենանք ներքնապես ավելի կայացած ու ամուր, անվտանգային առումով՝ ավելի ամրացած ու ժամանակակից հարևան, որի հետ ունենք եղբայրական հարաբերություններ: Նշված և մի շարք այլ գործոններ վկայում են Վրաստանի հետ մեր հարաբերությունների առանձնահատուկ բնույթի և դրանք էլ ավելի խորացնելու անհրաժեշտության մասին:
Այդ առումով ողջունելի է Վրաստանի վարչապետի այցը Հայաստան:
Բարի գալուստ Երևան, բատոնո Գախարիա:
https://www.facebook.com/babajanyana/posts/2774955302535179
