«Ժամանակ» օրաթերթն այսօր ««Յուրայիններին» չնեղացնելու գործելակերպ՝ ՊԵԿ-ում. Սերժի Վաչոյի ընկերության դեմ կազմված ակտը «ջրվել» է» վերտառությամբ լուր է հրապարակել, որում գրել էինք, որ ՊԵԿ-ը հեղափոխությունից հետո, հատկապես վերջին շրջանում, բավական ուշագրավ գործելակերպ է որդեգրել։ Փորձելով ցույց տալ, որ իրենք հետևում են վարչապետի կոչին՝ անողոք պայքարում են ստվերի դեմ, շատ հաճախ տնտեսվարողների խոշոր ընկերություններում ստուգումներ են իրականացնում, ակտեր են կազմում, սակայն ավելի ուշ, երբ հայտնաբերված խախտումների շուրջ աղմուկը մարում է, այդ ակտերը չեղարկվում են կամ մեղմվում։ Վերջերս մենք մի քանի նման դեպքերի անդրադարձել էինք։ Գրել էինք, որ վերջերս էլ հարկայինը Սերժ Սարգսյանի թիկնազորի պետ Վաչագան Ղազարյանին՝ Սերժի Վաչոյին պատկանող «Սեզամգազ»-ում ստուգումների արդյունքում ակտ է կազմել, սակայն այդ ակտը արդեն ՊԵԿ գանգատարկման հանձնաժողովում «ջրվել» է։
Լուրի հրապարակումից հետո ՊԵԿ-ը պարզաբանում է տարածել՝ նշելով. «Ի պատասխան տարածված այս տեղեկատվության՝ ՊԵԿ տեղեկատվության և հասարակայնության հետ կապերի բաժինը հայտնում է, որ ՊԵԿ հարկային և մաքսային մարմինների բողոքարկման հանձնաժողովը, քննության առնելով ՀՀ ՊԵԿ Խոշոր և միջին հարկ վճարողների հարկային տեսչություն-վարչության 18.01.2019 թվականի թիվ 1011589/1 ստուգման ակտն անվավեր ճանաչելու վերաբերյալ «Սեզամ-Գազ» ՍՊԸ-ի դիմում-բողոքը և դրանում ընկերության կողմից ներկայացված լրացուցիչ փաստարկները, որոշել է ընկերությունում նշանակել վերստուգում, որը, ի դեպ, դեռևս ավարտված չէ»։
ՊԵԿ-ից նաև նշել են, որ հանձնաժողովի քննարկման արդյունքները և կայացված որոշումը գաղտնիք չեն և հրապարակված են ՊԵԿ պաշտոնական ինտերնետային կայքում։ Ուշագրավ է, սակայն, որ նույն ՊԵԿ կայքում շատ հանգիստ կարելի է տեսնել, որ «Սեզամգազ»-ի բողոքը ստուգման ակտի վերաբերյալ այս տարվա օգոստոսի 6-ին բավարարվել է։
