Անցյալ շաբաթ Գործադիրը հաստատեց դատական և իրավական բարեփոխումների 2019-2023թթ ռազմավարությունը և դրանից բխող գործողությունների ծրագրերը: Կառավարությունը հոկտեմբերի սկզբին հաստատել էր նաև Հակակոռուպցիոն ռազմավարությունը և դրա իրականացման միջոցառումների ծրագիրը։ Հակակոռուպցիոն ռազմավարության շրջանակներում նախատեսվում է ստեղծել հակակոռուպցիոն մարմնի տարանջատված մոդել՝ Կոռուպցիայի կանխարգելման հանձնաժողովի և Հակակոռուպցիոն կոմիտեի տեսքով։
Թեմայի շուրջ «Առաջին լրատվական»-ը զրուցեց «Իրազեկ քաղաքացիների միավորում» ՀԿ ծրագրերի համակարգող Դանիել Իոաննիսյանի և «Իրավաբանների հայկական ասոցիացիայի» հակակոռուպցիոն փորձագետ, իրավաբան Արտյոմ Մեսրոպյանի հետ:
Ա. Մեսրոպյանի խոսքով՝ Սահմանադրության որոշակի դրույթների հակասում է Կոռուպցիայի կանխարգելման հանձնաժողովում փոփոխություններ և լրացումներ կատարելու մասին օրինագիծը, որն ԱԺ-ի կողմից ընդունվեց սույն թվականի սեպտեմբերի 13-ին և ներկայացվել է նախագահի ստորագրմանը: ««Իրավաբանների հայկական ասոցիացիան» դիմել էր նախագահին՝ խնդրելով չստորագրել օրենքը, քանի որ օրենքում առկա կարգավորումները խնդրահարույց են և միանշանակ չեն ընկալվում: Առաջարկվել էր քննարկումներ կազմակերպել, ինչը չի արվել: Նման ձևով օրենքի ընդունումը հարցերի տեղիք է տալիս: Առաջին՝ խնդրահարույց է դիտարկվում այն, որ հանվում է Կոռուպցիայի կանխարգելման հանձնաժողովի ձևավորման մրցութային կարգը, և հանձնաժողովը կազմավորվելու է Կառավարության, ԱԺ-ի և ԲԴԽ-ի կողմից»,- նշեց Ա. Մեսրոպյանը՝ ընդգծելով նաև, որ կոռուպցիայի դեմ պայքարի մարմինները պետք է լինեն անկախ և նրանց գործունեությունը պետք է լինի անաչառ, մինչդեռ իշխանությունն այս մոտեցումից շեղվում է:
Դանիել Իոաննիսյանի խոսքով՝ եթե ՀԿ-ները դիմում են ՀՀ նախագահին՝ խնդրելով չստորագրել նախագիծը և ուղարկել ՍԴ, նա պարտավոր է պատասխանել, պարզաբանել օրենքը ստորագրելուց առաջ:
Մանրամասն՝ տեսանյութում:
