47 տարեկան հասակում մահացել է հույն դիզայներ Սոֆիա Կոկոսալակին, հաղորդում է The Guardian-ը:
Նրա մահվան պատճառը չի հաղորդվում:
Սոֆիա Կոկոսալակին ծնվել է Աթենքում 1972 թ.-ին: Լոնդոնի Սբ.Մարտինի անվան արվեստի և դիզայնի քոլեջը նա ավարտել է 1998-ին, իսկ մեկ տարի անց ստեղծել իր սեփական ապրանքանիշը և մասնակցել Լոնդոնի նորաձևության շաբաթին: 2004-ին նրան է վստահվել Աթենքի ամառային օլիմպիական խաղերի բացման և փակման արարողությունների համար հանդերձանքների դիզայնը, իսկ 2006-ին նրան հրավիրել են Vionnet նորաձևության տուն՝ որպես ստեղծագործական տնօրեն:
Կոկոսալակին նաև հարսանեկան զգեստներ էր կարում: Նա իր առաջին հարսանեկան հավաքածուն թողարկել է 2012-ին: Նա հաճախ էր հունական ավանդական հագուստի տարրեր օգտագործում իր աշխատանքներում: Կոկոսալակիի հանդերձանքները, ի թիվս այլոց, կրում էին դերասանուհիներ Կիրստեն Դանսթը, Քլոե Սեվինյին և Ջենիֆեր Քոնելին: