Քրդական զինված «Ժողովրդական ինքնապաշտպանական ուժերը» (YPG) բանտից ազատ են արձակել «Իսլամական պետություն» ահաբեկչական խմբավորման զինյալներին: Այս մասին RIA Novosti-ին հայտնել է թուրքական բարձրաստիճան աղբյուր։
Նրա խոսքով՝ դա տեղի է ունեցել սիրիական սահմանամերձ Թել Աբյադ քաղաքում: Գործակալության զրուցակիցը հայտնել է, որ թուրքական ուժերը հարձակվել են այն տարածքի վրա, որտեղ գտնվել է ջիհադիստների բանտը, որպեսզի նրանց բերման ենթարկեն, բայց զինվորների ժամանման ժամանակ բանտախցերում ոչ ոք չի եղել։
Անկարան կարծում է, որ քուրդ պահակները ազատ են արձակել բանտարկյալներին, քանի որ շենքի բոլոր դռները անվնաս են եղել: YPG գրոհայինները «ազատել են ԻՊ-ի մարտիկներին՝ տարածաշրջանում քաոս ստեղծելու փորձ կատարելու համար»,- հավելել է աղբյուրը: