ՀՀ Սահմանադրական դատարանը որոշում է կայացրել մերժել ՍԴ նախագահի պաշտոնը զբաղեցնող Հրայր Թովմասյանի լիազորությունները դադարեցնելու վերաբերյալ ԱԺ-ի կողմից ուղարկված դիմումի քննությունը։
Թեմայի շուրջ «Առաջին լրատվական»-ի հետ քննարկմանը մասնակցեցին ԱԺ «Իմ քայլը» խմբակցության պատգամավոր Արեն Մկրտչյանը, «Ժառանգություն» կուսակցության փոխնախագահ Նարինե Դիլբարյանը:
Նարինե Դիլբարյանի դիտարկմամբ՝ ԱԺ դիմումը ձևակերպելու պահից ի վեր քաղաքական շրջանակներում և վերլուծաբանների շրջանում գերակշռում էր այն կարծիքը, որ այս կազմով գործող Սահմանադրական դատարանը կմերժեր դիմումը: «Սա իսկապես պայքար է: Այս ՍԴ-ն ձևավորված է հին համակարգի օրենքներով, հետևաբար ակնկալելի էր, որ ԱԺ դիմումը կմերժվեր: ՍԴ-ն կոշտ դիրքորոշում որդեգրեց և հրաժարվեց որևէ փոխզիջումից՝ կանխավ բացառելով անգամ լիազորությունները դադարեցնելու վերաբերյալ հիմքերի քննարկումը»,- նշեց Ն. Դիլբարյանը:
Արեն Մկրտչյանի խոսքով՝ Սահմանադրական դատարանն՝ իր այս կազմով չի ներկայացնում ՀՀ քաղաքացիներին: «Անընդհատ տպավորություն է, որ ՍԴ անդամները, մասնավորապես Հրայր Թովմասյանը կառչած են իրենց աթոռներից: 2018թ. մարտի 2-ից մինչև 2019թ. հունվարի 14-ը Հ. Թովմասյանը եղել է թե՛ ԱԺ պատգամավոր, թե՛ ՍԴ անդամ՝ կոպտորեն ոտնահարելով ՀՀ Սահմանադրությունը… Հակասահմանադրական սխեմայի մաս է կազմել նաև ԱԺ այն ժամանակվա նախագահը, խախտվել է ԱԺ պատգամավորի և ՍԴ անդամի լիազորությունների անհամատեղելիության սկզբունքը և ԱԺ պատգամավորի լիազորությունների կայունության սկզբունքը, և իրավապահ կառույցները պետք է ուշադրություն դարձնեն այս հանգամանքի վրա ևս… Սկսվել է զուգահեռ պրոցես պատգամավոր Արման Բաբաջանյանի նախաձեռնությամբ»,- նշեց Ա. Մկրտչյանը՝ հավելելով, որ պատգամավորների մեկ հինգերորդի ստորագրությամբ իրավապահներին է փոխանցվել նախկին ԱԺ-ի կողմից կայացված որոշման սահմանադրականությունը վիճարկելու մասին դիմումը, և այստեղ արդեն ընկրկելու հնարավորություն չեն ունենալու, որովհետև սա արդեն քրեաիրավական հարթության մեջ քննարկվող հարց է:
Նարինե Դիլբարյանը, անդրադառնալով դիտարկմանը, որ այս ընթացքում Հրայր Թովմասյանն արձակուրդ է վերցրել, կարծիք հայտնեց, որ դրանով նա դիվանագիտական քայլ է կատարել՝ ստեղծելով իմիտացիա, որ ճնշում չի գործադրել ՍԴ-ի վրա:
Մանրամասն՝ տեսանյութում:
