Ադրբեջանական APA լրատվական գործակալության փոխանցմամբ՝ հուլիսի 12-ին ԵԱՀԿ Մինսկի խմբի համանախագահներ Բեռնար Ֆասիեն (Ֆրանսիա), Ռոբերտ Բրադտկեն (ԱՄՆ) և Իգոր Պոպովը (Ռուսաստան), ինչպես նաև ԵԱՀԿ գործող նախագահի անձնական ներկայացուցիչ Անջեյ Կասպրշիկը (Լեհաստան) Վիլնյուսում հանդիպում են ունեցել ԵԱՀԿ գործող նախագահ, Լիտվայի արտգործնախարար Աուդրոնյուս Աժուբալիսի հետ։ Այս մասին հայտարարել է Լիտվայի արտգործնախարարությունը։
Հանդիպման ժամանակ միջնորդները ԵԱՀԿ գործող նախագահին իրազեկել են ղարաբաղյան բանակցային գործընթացի և հունիսի 24-ին Կազանում կայացած եռակողմ հանդիպման մասին։ Քննարկվել են նաև ղարաբաղյան հակամարտության կարգավորման հեռանկարները, կողմերը մտքեր են փոխանակել մինչև տարեվերջ բանակցությունների վերաբերյալ իրենց պլանների մասին։
Հանդիպման ժամանակ Աժուբալիսն իր աջակցությունն է հայտնել ԵԱՀԿ Մինսկի խմբի համանախագահներին՝ ղարաբաղյան հակամարտության կարգավորման հարցում բեկման հասնելու համար։ Բացի այդ, Աժուբալիսը կոչ է արել վստահության մթնոլորտի ամրագրման հարցում ավելի մեծ չափով ներգրավել քաղաքացիական հասարակություններին.
«Դա իր ներդրումը կունենա հակամարտության կարգավորման գործընթացում և կնպաստի հասարակությունների միջև վստահության ամրագրմանը»։
