Լուրեր
Վրաստանը կարևորում է ռեալ պոլիտիկը. Երևանում Գախարիան տարածաշրջանային անվտանգության մասով հստակ ուղերձներ կհնչեցնի
  • 20:00
  • 2019-10-14
  • Դիտումներ՝ *

Հոկտեմբերի 15-ին Հայաստան կժամանի Վրաստանի նոր վարչապետ Գեորգի Գախարիան, որը շաբաթներ առաջ նշանակվեց այդ պաշտոնին՝ Մամուկա Բախտաձեի անսպասելի հեռանալուց հետո: Այս և տարածաշրջանային մի շարք հարցեր «Առաջին լրատվական»-ը քննարկել է ԱԺ «Իմ քայլը» խմբակցության պատգամավոր Անուշ Բեղլոյանի և վրացագետ Ջոնի Մելիքյանի հետ:

Ջոնի Մելիքյանի խոսքով՝ Վրաստանի վարչապետի այցը հայ-վրացական հարաբերությունների  օրակարգը թարմացնելու հնարավորություն է ընձեռում, շատ կարևոր է, որ նոր վարչապետը ներկայացնի իր գերակա ուղղությունները՝ թե ինչպես է տեսնում ապագա զարգացումները երկկողմ հարաբերություններում: «Վրաստանը Հայաստանը դիտարկում է որպես կարևոր  երկիր տարածաշրջանում՝ թե՛ իրենց  ազգային անվտանգության ապահովման տեսանկյունից, թե՛ առևտրային հարաբերությունների կամ համատեղ ենթակառուցվածքային ծրագրերի առումով: Իմ սպասելիքները դրական են, նույնիսկ որոշ մեսիջներ կհնչեն Երևանում»,- հավելեց մեր զրուցակիցը:

Անուշ Բեղլոյանն իր հերթին շեշտեց, որ տարածաշրջանային անվտանգությունը, ըստ վրացական մամուլի, առաջնահերթ դեր է խաղում այսօրվա Վրաստանի արտաքին քաղաքականության օրակարգում: «Այն նախապատվությունները, որ ունի ներկայիս Վրաստանի կառավարությունը, ներգրավում է և՛ Հայաստանը, և՛ տարածաշրջանի մյուս երկրները… Առաջին հերթին պետք է նշել, որ վրացի վերլուծաբանները կարևորում են ճկուն արտաքին քաղաքականությունը և, հաշվի առնելով տարածաշրջանային զարգացումները, կոչ են անում ամուր, կայուն հարաբերություններ հաստատել հարևանների հետ»,- ասաց Բեղլոյանը՝ հավելելով, որ Վրաստանի վարչապետի ուղերձում առաջնահերթ են լինելու համատեղ անվտանգության, տարածաշրջանային մարտահրավերներին դիմակայելու կետերը:

 

Առավել մանրամասն՝ տեսանյութում:

  • Դիտումներ՝ *