Հայաստանի արտաքին գործերի նախարարության խոսնակ Աննա Նաղդալյանը հայտարարել է, որ հոկտեմբերի 14-ին և 15-ին տարածաշրջանային այցով Հայաստանում են լինելու ԵԱՀԿ Մինսկի խմբի համանախագահները։ Համանախագահները Հայաստանից հետո մեկնելու են նաև Արցախ։
Արցախի նախագահ Բակո Սահակյանի աշխատակազմի ղեկավար Դավիթ Բաբայանը Արցախ սպասվող այցելությունը կարևոր է համարում։ «Առաջին լրատվական»-ի հետ զրույցում Բաբայանն ասաց, որ նմանատիպ այցելություններն իրենք արժևորում են. «Նախ և առաջ՝ այդպիսի այցելությունները պահպանում են բանակցային գործընթացի շարունակականությունը և խաղաղ կարգավորման գործընթացը։ Իրենց հետ խոսելու ենք և՛ ավանդական թեմաներից, ինչի մասին միշտ խոսում ենք՝ հակամարտության կարգավորում, բանակցային ձևաչափի վերականգնում, տարածաշրջանում տիրող իրավիճակ։ Եվ նաև այլ հարցեր, որոնք ծագում են իրենց այցելությունների միջև ընկած ժամանակահատվածում։ Սպասում ենք նորմալ, բովանդակալից քննարկումներ»։
Հարցին՝ արդյոք անդրադա՞րձ է լինելու նաև Ալիևի վերջին հայտարարություններին, երբ նա, ի պատասխան ՀՀ վարչապետ Փաշինյանի հայտնի ելույթին, ասել էր, որ «Ղարաբաղը Ադրբեջան է», Բաբայանն արձագանքեց. «Իհարկե, դրա մասին էլ ենք խոսելու։ Գիտեք՝ սա էլ է արդեն ցույց տալիս Ադրբեջանի դիրքորոշումը։ Նա բազմաթիվ այդպիսի հայտարարություններ է արել, օրինակ, որ Շուշիում թեյ են խմելու, Երևանն իրենցն է։ Բնական է, որ այդ հայտարարությանը անդրադարձ կատարվելու է, և մենք ևս մեկ անգամ նշելու ենք, որ այդ տրամաբանությունը չի նպաստում կարգավորմանը, ու իրավիճակն էլ ավելի բարդացնում։ Մենք պետք է զգոն լինենք ու միասնական։ Տեսնում եք՝ ինչ է կատարվում Սիրիայում, Թուրքիան, բոլոր միջազգային կանոններն ու իրավունքները խախտելով, ներխուժել է այդ երկիր։ Մենք պետք է այս իրավիճակում լինենք համախմբված, ճիշտ աշխարհաքաղաքականություն վարենք ու իրականությունից չկտրվենք»։
Դավիթ Բաբայանը կարծում է, որ այսպիսի այցելությունները որևէ ձևով ազդեցություն չեն ունենում ո՛չ իրավիճակի բարդեցման, ոչ էլ մեղմացման տեսանկյունից. «Դա պարզապես պահպանում է խաղաղ բանակցային գործընթացը։ Իսկ հակառակորդը՝ անկախ այդ այցելություններից ու հայտարարություններից, դիմում է գործողությունների՝ ամեն օր ու ամեն վայրկյան։ Ադրբեջանը չի վերանայել ո՛չ իր քաղաքականությունը, ո՛չ տեսլականը, ո՛չ էլ նպատակները»։