«Կուտակված բոլոր խնդիրները իրենց վերջնական լուծումը չեն ստանում, դրա համար էլ ինչ-որ փուլում ինչ-որ խնդիր հետին պլան է մղվում, ինչպես, օրինակ, Ամուլսարի խնդիրը, և առաջին պլան են մղվում այլ խնդիրներ. հիմա արծարծվում է, որ Վենետիկի հանձնաժողովի հետ ինչ-որ առևտուր էր արվում Ստամբուլյան կոնվենցիայի շուրջ»,- «Առաջին լրատվական»-ի հետ զրույցում ասաց քաղտեխնոլոգ Վիգեն Հակոբյանը՝ չհամաձայնելով այն կարծիքի հետ, թե չի ստացվում հրահրել թեժ աշուն:
Նրա խոսքով՝ քանի որ հարցերը վերջնական լուծում չեն ստանում, իրավիճակն է դառնում ընդդիմադիր:
«Ժողովրդավարական համախմբում» նախաձեռնության համահիմնադիր, քաղաքագետ Սուրեն Պետրոսյանն էլ կարծում է, որ ստեղծված իրավիճակի համար պատասխանատվություն են կրում ինչպես իշխանությունը, այնպես էլ ընդդիմությունը: «Մի կողմում իշխանությունն է, որը կարծես թե կամք է փորձում ցուցաբերել բարեփոխումների համար, սակայն դեռևս չի կարողանում ձևակերպել՝ ինչպես և ում միջոցով: Մյուս կողմում այնպիսի դերակատարներ են, ինչը, ի դեպ, բնորոշ է քաղաքական մշակույթի ճգնաժամում գտնվող պետություններին, որտեղ սեփական իշխանության կորուստը նույնականացվում է պետության կորստին, և խուճապային իրավիճակներ են փորձում ներկայացնել, թե իբր մենք կորցրել ենք պետությունը, ոչ թե դերակատարներն են կորցրել իշխանությունը»,- «Առաջին լրատվական»-ի հետ զրույցում նշեց քաղաքագետը:
Վիգեն Հակոբյանը ի լրումն նկատեց, որ այսօրվա իշխանությունը, երբ ընդդիմություն էր, օգտագործում էր նույն գործիքակազմը. «Եվ իրենցից առաջ էլ ընդդիմադիրները միշտ կործանման մասին էին խոսում, մասնավորապես հերթապահ թեմա կա՝ Արցախի հարցը: Իսկ իշխանությունն էլ միշտ օգտագործում է իրեն բնորոշ գործիքակազմը՝ ցույց է տալիս, որ ամեն ինչ նորմալ է»:
Այս շրջափուլից դուրս գալու համար Վիգեն Հակոբյանը կարծում է, որ իշխանությունն ու ընդդիմությունը որոշակի պայմանավորվածության պիտի գան խաղի կանոնների շուրջ: Սուրեն Պետրոսյանն էլ համարում է, որ նախկինների վերադարձը պետք է բացառել. «Պետք է ուղղակի հաղթահարել անորոշությունները, մինչդեռ մեր շուրջբոլորը անորոշություններ են: Անորոշությունն է ծնում այս վայրիվերումները»:
Հարցազրույցն ամբողջությամբ՝ տեսանյութում: