Երեք օտարերկրյա լրագրողներ զոհվել են թուրքական ռազմական ինքնաթիռների հարձակման հետևանքով սիրիական Ռաս-էլ-Այն քաղաքի մերձակայքում: Այս մասին հաղորդել է Al Mayadeen հեռուստաալիքը՝ հղում անելով քրդական աղբյուրներին:
Ընդհանուր առմամբ, ըստ հեռուստաալիքի, Թուրքիայի ռազմական օդուժի հարձակման հետևանքով զոհվել է ավելի քան 11 քաղաքացիական անձ: Բուժաշխատողների խոսքերով, զոհերի թիվը կարող է աճել, քանի որ ռմբակոծության ժամանակ վիրավորվել է մոտ 100 մարդ: Տուժածներից ոմանք ծանր վիճակում գտնվում են հոսպիտալում:
Շարասյունը, որը գնդակոծվել է օդից, սիրիական սահմանային Քամիշլի քաղաքից շարժվում էր Սիրիայի հյուսիսարևելյան Ռաս-էլ-Այն քաղաք:
Նշվում է, որ ուղևորների շարքում եղել են արտասահմանյան լրատվամիջոցները ներկայացնող լրագրողներ: Մասնավորապես, ինչպես նշել են աղբյուրները, ավտոբուսում եղել են մի քանի անգլիացի և ֆրանսիացի թղթակիցներ, ինչպես նաև տեղական լրատվամիջոցների լրագրողներ: Նրանք գնում էին դեպի քրդական ստորաբաժանումների և Սիրիայի հյուսիս-արևելքում ռազմական գործողություն իրականացնող թուրքական ուժերի միջև ռազմական բախումների գոտի: