Ոչ ոք չի կարող վիճել այն փաստի հետ, որ ծաղրածուները երբեմն անհասկանալի վախ են ներշնչում: Այս միտքը արմատավորվեց հատկապես Սթիվեն Քինգի կուլտային «Դա» վեպից հետո, որի պատճառով նույնիսկ մեծահասակները կարող էին վեր թռչել տեսադաշտում կարմիր քիթ-կոճակի հայտնվելու դեպքում: Բայց ի տարբերություն Փենիվայզի՝ ծաղրածու Վրինքլսը միանգամայն իրական է:
Դիմակի հետևում թաքնված տղամարդու մասին շատ բան հայտնի չէ: 69-ամյա տղամարդը ստիպված է թաքցնել իր ինքնությունը, քանի որ ամեն օր սպառնալիքներով զանգեր է ստանում: Բայց ամուսնալուծված վետերանը Ռոդ-Այլենդից Ֆլորիդա տեղափոխվելուց հետո պարզապես որոշել էր մի փոքր հետաքրքիր դարձնել թոշակառուի իր ձանձրալի կյանքը և նաև գումար վաստակել, գրում է The Sun-ը:
Սարսափելի դիմակով տղամարդը սկսել է զանգեր ստանալ հուսահատ ծնողներից, որոնք չէին կարողանում հնազանդեցնել իրենց երեխաներին: Ծաղրածուն այնքան հայտնի է դարձել, որ նրա մասին նույնիսկ վավերագրական ֆիլմ են նկարահանել, որը թողարկվել է այս տարվա հոկտեմբերի 4-ին:
«Ես չեմ կարծում, որ իմ զբաղմունքը դաժան բան է: Այդ երեխաների ծնողները շատ ավելի դաժան են, քանի որ ես պարզապես կատարում եմ նրանց հրահանգները, իսկ նրանք պատվիրում են ինձ՝ մղձավանջի վերածելով իրենց երեխաների կյանքը»: