Հռոմի Ֆրանցիսկոս պապը միջազգային հանրությանը կոչ է արել արդյունավետ լուծումներ գտնել Սիրիայում և մտահոգություն է հայտնել Էկվադորում վերջին զարգացումների վերաբերյալ:
«Իմ մտքերը կրկին Մերձավոր Արևելքում են: Հատկապես, սիրելի և ուժասպառ Սիրիայում, որտեղից կրկին դրամատիկ լուրեր են ստացվում երկրի հյուսիս-արևելքի բնակչության ճակատագրի մասին, որոնք ռազմական գործողությունների պատճառով ստիպված են լքել իրենց տները: Այս մարդկանց թվում կան նաև բազմաթիվ քրիստոնյա ընտանիքներ: Ես ներգրավված բոլոր կողմերին և միջազգային հանրությանը կոչ եմ անում անկեղծ և ազնիվ գնալ երկխոսության ճանապարհով՝ արդյունավետ լուծումներ գտնելու համար»,- ասել է քահանայապետը՝ Վատիկանում կայացած ավանդական կիրակնօրյա քարոզի ժամանակ:
Հոկտեմբերի 9-ին Թուրքիայի նախագահ Թայիփ Էրդողանը հայտարարեց Թուրքիայում արգելված Քրդստանի աշխատավորական կուսակցության և ԻՊ ահաբեկչական խմբավորման դեմ Սիրիայի հյուսիսում «Խաղաղության աղբյուր» գործողության մեկնարկի մասին:
Թուրքական ավիացիան նույն օրը հարձակվեց երկու երկրների սահմանին գտնվող Ռաս էլ-Այն քաղաքի և Սիրիայի մի շարք այլ քաղաքների վրա: Սիրիայի իշխանությունները բազմիցս դատապարտել են Սիրիայի հյուսիսում Թուրքիայի զավթողական քաղաքականությունը:
