Հայաստանի վարչապետ Ն. Փաշինյանի և Ադրբեջանի նախագահ Ի. Ալիևի միջև այսօր Աշխաբադում բանավեճ է ծավալվել Գարեգին Նժդեհի վերաբերյալ: ԱՊՀ երկրների ղեկավարների նիստում Ալիևը Նժդեին համարել է «նացիստների աջակից, որին հերոսացրել է Հայաստանի նախկին իշխանությունը», իսկ Նիկոլ Փաշինյանը բավականին կոշտ արձագանք է տվել: Վարչապետը մասնավորապես նշել է. «Անկեղծ ասած, երբ լսեցի Ալիևի գնահատականները Գարեգին Նժդեհի մասին, հիշեցի խորհրդային հայտնի «Կովկասի գերուհին» կինոնկարը, երբ Շուրիկը հարցնում է. «Մատուռն է՞լ եմ ես քանդել»: Իլհամ Հեյդարովիչի ելույթից տպավորություն է ստեղծվում, որ Հիտլերը երկրորդական դեր է խաղացել, իսկ նացիստական շարժման առաջնորդը Գարեգին Նժդեհն էր: Բայց իրականությունն այն է, որ Գարեգին Նժդեհը պայքարել է Թուրքիայի կողմից Հայաստանի օկուպացման դեմ, պայքարել է Հայոց ցեղասպանության դեմ, և բազմաթիվ ռուս սպաների հետ 1918 թվականին հայ-թուրքական պատերազմի ժամանակ ղեկավարել է ռազմաճակատի շատ կարևոր հատվածը…»:
Թեմայի շուրջ «Առաջին լրատվական»-ի հետ քննարկմանն իրենց դիտարկումները ներկայացրին ռազմաքաղաքական վերլուծաբան Լեոնիդ Ներսիսյանը և քաղաքագետ Նարեկ Մինասյանը: Նրանց կարծիքով՝ Նիկոլ Փաշինյանի հակահարվածը դիպուկ էր և տեղին:
«Ադրբեջանը շարունակում է պատմական իրողություններ աղավաղելով՝ իր քարոզչական թեզերը մատուցելու քաղաքականությունը: Հաշվի առնելով նաև այն հանգամանքը, որ երկրորդ աշխարհամարտի հետ կապված թեմատիկան բավականին զգայուն է Ռուսաստանի և ընդհանրապես հետխորհրդային տարածքի երկրների համար, Ալիևը ԱՊՀ-ի ամբիոնը օգտագործեց այդ զգայուն թեմային հարվածելու համար,- նշեց Նարեկ Մինասյանը: -Հայաստանի վարչապետի պատասխանը բավականին հաջող էր, կարելի է մի քանի բաղադրիչներ առանձնացնել, առաջինը հումորային պահն էր, որը ցույց է տալիս, թե որքան անլուրջ են նման մեղադրանքները, մյուս կողմից՝ հստակ արձանագրվեց, որ տեղի է ունենում պատմական փաստերի խեղաթյուրում և ապատեղեկատվության տարածում, և կար նաև բարոյական տարրը՝ հստակ նշվեց, որ օրակարգից շեղվելը և ապատեղեկատվություն տարածելը անհարգալից վերաբերմունք է ոչ միայն հայ ժողովրդի, այլ նաև ԱՊՀ մյուս երկրների ղեկավարների նկատմամբ: Վարչապետի ուղերձները բավականին դիպուկ էին»:
Մանրամասն՝ տեսանյութում: