Աշխաբադում ԱՊՀ երկրների ղեկավարների հանդիպման թերևս գլխավոր ինտրիգը համարվում է Հայաստանի վարչապետի արձագանքը Ադրբեջանի նախագահի ելույթին: ԱԺ Արտաքին հարաբերությունների մշտական հանձնաժողովի նախագահ Ռուբեն Ռուբինյանն «Առաջին լրատվական»-ի հետ զրույցում նշեց, որ Ադրբեջանի մարտավարությամբ՝ ցանկացած բան, որը վնասում է Հայաստանին կամ Հայաստանի և այլ գործընկերների միջև հարաբերություններին, կարելի է օգտագործել նաև Արցախյան հակամարտության համատեքստում. «Բայց ինչպես ականատես եղանք, այդ թույլ հնարքը չստացվեց, և պատմական փաստերի խեղաթյուրմանը տրվեց հուժկու պատասխան… Կան անհերքելի փաստեր, որ Գարեգին Նժդեհը հայ հերոս է, և ոչինչ մեզ չի խանգարում ճշմարտությունը ներկայացնել մեր գործընկերներին, ինչն էլ արվեց վարչապետի շուրթերով»:
Անդրադառնալով Հայաստանի ներքաղաքական զարգացումներին՝ մասնավորապես Արցախի անվտանգության խորհրդի նախկին նախագահ Վիտալի Բալասանյանի հայտարարություններին, որոնք, որոշ ձևակերպումներով, սպառնալիք են պարունակում՝ ուղղված Հայաստանին և վարչապետին, Ռ. Ռուբինյանը նշեց, որ հավանաբար դա նախընտրական խաղատախտակի վրա տեղի ունեցող պրոցես է. «Մեծ հաշվով, այս թեման անկարևոր եմ համարում, անկարևոր անձ եմ համարում Վիտալի Բալասանյանին, և կարծում եմ, որ կան գծեր, որոնք չի կարելի անցնել: Ուրախ եմ, որ Արցախից էլ կան նման մեկնաբանություններ հենց այն մասին, որ կան գծեր, որոնք չի կարելի անցնել»:
Չէի ուզենա, որ ուշադրություն դարձվեր անկարևոր անձանց անկարևոր հարցազրույցներին… Ցանկալի է, որ յուրաքանչյուր ներկա և նախկին պաշտոնյա ուշադիր լինի իր խոսքի մեջ և չանցնի որոշակի գծեր: Արցախի և Հայաստանի իշխանությունները թույլ չեն տա որևիցե լարում՝ անկախ որոշ անձանց անզգույշ և ոչ այնքան պարկեշտ հայտարարություններից»,- ընդգծեց Ռ. Ռուբինյանը:
Մանրամասն՝ տեսանյութում:
