Հունական լրատվամիջոցներում հայտնված այն տեղեկությունները, ըստ որոնց` Թուրքիան համաձայնել է թույլ տալ Հունաստանին` ավելացնել Էգեյան ծովի իր ջրային տարածքը, երկուշաբթի հերքել է հենց Թուրքիայի վարչապետ Ռեջեփ Թայիփ Էրդողանը: Այս մասին հաղորդում է թուրքական Hurriyet-ը: «Ոչ մի համաձայնագիր այդ կապակցությամբ դեռ չկա: Բանակցությունները դեռ ընթացքի մեջ են»,- հայտարարել է Էրդողանը: Հիշեցնենք, որ Թուրքիայի և Հունաստանի միջև տասնամյակներ շարունակ չեն դադարում տարածքային վեճերը Էգեյան ծովի շուրջ: Ջրային և ցամաքային սահմանները այդ ծովի ավազանում մինչև այսօր մնում են չհստակեցված, ինչի արդյունքում պարբերաբար աճում է լարվածությունը, տեղի են ունենում բախումներ նաև այդ շրջանի օդային տարածքում:
Հունական To Vima թերթը նախօրեին հայտնել էր, որ Թուրքիան և Հունաստանը համաձայնության են եկել, և հունական կողմը իր ջրային տարածքը կմեծացնի 6-12 մղոնով: Վարչապետ Էրդողանը, հերքելով այս լուրը, ասել է, որ եթե որևէ համաձայնություն լինի, ապա կողմերը հանդես կգան համատեղ հայտարարությամբ:
Թուրքիայի արտգործնախարար Ահմետ Դավութօղլուն իր հերթին հայտնել է, որ այս հարցում կա առաջընթաց: «Այս պահին կարիք չկա մանրամասների մասին խոսել: Մենք կարևորում ենք բարի կամքի և հաստատակամության ոգով բանակցությունների շարունակումը»,- հայտարարել է նա: