«Եվրոպական դատարանի վճիռն ամբողջությամբ ինձ բավարարում է, և շատ ուշագրավ է, որ այն կայացվեց հենց Մարտի 1-ի գործի քննությանը և դատավարությանը զուգահեռ։ Այս վճիռը ևս մեկ ապացույց է, որ 2008 թվականի մարտի 1-ին նախորդ իշխանության գործողությունները եղել են բացարձակ ապօրինի»,- «Առաջին լրատվական»-ի հետ զրույցում ասաց ՀԱԿ անդամ, 2008 թվականին ազատազրկված Դավիթ Մաթևոսյանը։
Նշենք, որ Մարդու իրավունքների եվրոպական դատարանը երեկ հրապարակել է Մարտի 1-ի դեպքերի վերաբերյալ հերթական վճիռն ընդդեմ Հայաստանի։ ՄԻԵԴ-ը վճռել է, որ խախտվել է Դավիթ Մաթևոսյանի խաղաղ հավաքների ազատության իրավունքը։ Դատարանը պարտավորեցրել է ՀՀ կառավարությանը Մաթևոսյանին վճարել 13 հազար 200 եվրո փոխհատուցում։
2008 թվականի ընտրություններում նախագահի թեկնածու Լևոն Տեր-Պետրոսյանի նախընտրական շտաբի անդամ Դավիթ Մաթևոսյանը ձերբակալվել էր մարտի 1-ի առավոտյան՝ Ազատության հրապարակի խաղաղ հավաքը ցրելուց հետո։ Նրան մեղադրանք է առաջադրվել ոստիկանի նկատմամբ բռնություն գործադրելու համար միայն ոստիկանության երկու աշխատակցի ցուցմունքների հիման վրա: Մաթևոսյանը դատապարտվել էր երեք տարվա ազատազրկման, անազատության մեջ անցկացրել շուրջ մեկուկես տարի: ՄԻԵԴ-ը ճանաչել է նաև դիմողի արդար դատաքննության իրավունքի խախտում:
«Այս վճիռը նորից փաստեց, որ ամեն ինչ 2008-ին եղել է ապօրինի՝ սկսած 2008-ի առավոտից՝ առանց հայտարարելու, զգուշացնելու ցույցը ցրելուց։ Այդ ժամանակ ես շատ լավ էի ուսումնասիրել հավաքների ազատության մասին օրենքը։ Հրաշալի օրենք էր, որը հետո ձևախեղեցին։ Այդ օրենքի շրջանակներում մեր բոլոր գործողությունները եղել են օրինական, իսկ իշխանությունների գործողությունները՝ ապօրինի»,- ընդգծեց Մաթևոսյանը։
Դավիթ Մաթևոսյանը նաև նշեց, որ այս վճիռը նաև կարող է նպաստավոր իրավիճակ առաջացնել հայկական արդարադատության շրջանակներում մյուսների արդարացման համար։
Ինքը՝ Մաթևոսյանը, առաջիկայում փաստաբանի հետ խորհրդակցելուց հետո կդիմի նաև Գլխավոր դատախազություն, որպեսզի սկսվի արդարացման գործընթաց: «Դեռ չեմ պլանավորել անելիքս, բայց պաշտպանիս հետ խորհրդակցելուց հետո և իրավական գործընթացների հնարավորության պարագայում պետք է դիմել»,- ասաց Մաթևոսյանը՝ նշելով, որ պետք է իրավական մեխանիզմներ գտնել, որ նման վճիռների դեպքում փոխհատուցումը տրամադրի ոչ թե կառավարությունը, այլ «մեղադրական եզրակացությունը հաստատողը և այդ եզրակացությունը դակիչով դատավճռի վերածողները»։
Նշենք, որ Դավիթ Մաթևոսյանի վերաբերյալ ՄԻԵԴ վճռից առաջ էլ արդար դատաքննության իրավունքի խախտման վերաբերյալ ընդդեմ Հայաստանի վճիռներ էին հրապարակվել առաջին նախագահ Լևոն Տեր-Պետրոսյանի, Գրիգոր Ոսկերչյանի, Մուշեղ Սաղաթելյանի, Վարդգես Գասպարիի, Մասիս Այվազյանի գործերով:
Նրանց մի մասի գործերով արդեն իսկ վճռաբեկ դատարանով սկսվել է արդարացման գործընթաց։
