«Զուտ հանդիպման փաստը որևէ քաղաքական ենթատեքստի հիմք չի տալիս, եթե, իհարկե, հաշվի չառնենք այն իրավիճակը, որը ստեղծվել է Սահմանադրական դատարանի շուրջ։ Այդ հայտնի իրավիճակը հայտնի է նաև դեսպանին»,- «Առաջին լրատվական»-ի հետ զրույցում ասաց քաղաքագետ Հակոբ Բադալյանը։
Հիշեցնենք, որ Սահմանադրական դատարանի նախագահ Հրայր Թովմասյանը հոկտեմբերի 8-ին ընդունել էր Հայաստանի Հանրապետությունում Գերմանիայի Դաշնության նորանշանակ արտակարգ և լիազոր դեսպան Միխայել Բանցհաֆին:
Դեսպանն անդրադարձել էր Սահմանադրական դատարանի և Գերմանիայի դեսպանության միջև առկա ջերմ և համագործակցային հարաբերություններին և հայտնել իր հանձնառությունն առ այն, որ արդյունավետ և ակտիվ համագործակցությունը կկրի շարունակական բնույթ:
Հրայր Թովմասյանը դեսպանին հայտնել էր, որ 2020 թվականի սկզբին նախապատրաստվում է իր գլխավորած պատվիրակության այցը Գերմանիա։
Զրուցակիցներն անդրադարձել են նաև Հայաստանի Հանրապետությունում դատաիրավական ոլորտի ընթացիկ հիմնախնդիրներին և բարեփոխումներին՝ կարևորելով վերջիններիս իրականացումը ՀՀ Սահմանադրությանը և Հայաստանի միջազգային պարտավորություններին համահունչ:
«Սահմանադրական դատարանի շուրջ ստեղծված իրավիճակում դեսպանի հետ հանդիպումը կարող ենք դիտարկել որպես որոշակի քաղաքական լոյալության դրսևորում։ Բայց սա ենթադրությունների մակարդակում է, քանի որ բովանդակային առումով նման ենթադրություն անելու առիթ չունենք»,- ասաց Բադալյանը։
Նրա խոսքերով՝ ժամանակ առաջ արդեն Հայաստանում ՌԴ դեսպանի հետ հանդիպումը մեկնաբանությունների պատճառ դարձավ՝ հաշվի առնելով Հայաստանի ներքաղաքական կյանքում Ռուսաստանի ընկալման իրողությունը։ Բացի դրանից՝ այդ ամենից ընդամենը մեկ շաբաթ առաջ ՌԴ դեսպանը հանդիպել էր Ռոբերտ Քոչարյանի հետ։ «Դրա համար ՌԴ դեսպանի հետ հանդիպումը նման աղմկոտ մեկնաբանությունների տեղիք տվեց։ Բայց այս պարագայում բուն հանդիպման փաստը հետաքրքիր է այն հանգամանքով, որ կա Սահմանադրական դատարանի շուրջ հայտնի աղմուկ հանած գործընթաց, և դրա ֆոնին դեսպանի հանդիպումը Հրայր Թովմասյանի հետ որոշակի քաղաքական համատեքստի մասին խոսելու առիթ տալիս է»,- ընդգծեց քաղաքագետը։
Մեր դիտարկմանը՝ առհասարակ դեսպանները ինչ առնչություն ունեն Սահմանադրական դատարանի հետ, որ նման հաճախականությամբ հանդիպումներ են տեղի ունենում, Բադալյանը պատասխանեց. «Հայաստանը թե՛ Գերմանիայի, թե՛ եվրոպական այլ երկրների, կառույցների հետ լուրջ գործակցություն ունի՝ հատկապես դատաիրավական ոլորտի մասով։ Հետևաբար, այդ տեսանկյունից ոչ մի արտառոց բան չկա, որ կարող է լինել հանդիպում նաև Սահմանադրական դատարանի հետ։ Զուտ մասնագիտական տիրույթում զարմանալի ոչ մի բան չկա»։
