Հայաստանը դատապարտում է Թուրքիայի ներխուժումը Սիրիա և միջազգային հանրությանը կոչ է անում կանխել այն, կանխարգելել դրա հետևանքով մարդասիրական աղետի սպառնալիքը: Այս մասին հայտարարել է վարչապետ Նիկոլ Փաշինյանը կառավարության նիստում՝ հավելելով, որ կլինի փակ քննարկում ստեղծված իրավիճակի և Հայաստանի քայլերի շուրջ:
Որո՞նք են լինելու Հայաստանի քայլերը. նախևառաջ Հայաստանի մտահոգությունը պետք է լինի ռազմական գործողությունների դիապազոնում գտնվող հայության անվտանգությունը: Այդ գոտում ապրում են մի քանի հազար հայեր, ըստ տարբեր փորձագիտական գնահատականների՝ մոտ 3000: Անհրաժեշտ է հնարավորն անել հայերի անվտանգությունն ապահովելու, հարկ եղած դեպքում նրանց Հայաստան տեղափոխելու համար:
Թեմայի շուրջ «Առաջին լրատվական»-ի հետ քննարկմանը մասնակցեցին վերլուծաբան Հակոբ Բադալյանը, քաղաքագետ Ռոբերտ Ղևոնդյանը և Հայ կառուցողական կուսակցության նախագահ Անդրիաս Ղուկասյանը:
Հակոբ Բադալյանի դիտարկմամբ՝ Սիրիայում պատերազմը, ըստ էության, ավարատված չէր, ակնհայտ է, որ ռազմական ակտիվ նոր փուլ է սկսվում Թուրքիայի գործողություններով: «Միայն Սիրիայի հարցը չէ, կարծում եմ՝ շատ ավելի լայն, տարածաշրջանային համատեքստում քաղաքական գործընթացների նոր փուլ է և դերակատարների բավական ընդգրկուն շրջանակ կներառի»,- նշեց վերլուծաբանը՝ հավելելով, որ ճգնաժամը Սիրիայում կարգավորված չի եղել, և եթե կոնֆլիկտը մարած չէ, ապա դրա ակտիվացումը զարմանալի չէ:
Անդրադառնալով հարցին, թե արդյոք Թուրքիայի ներխուժումը Սիրիա կարող է հայ- ադրբեջանական սահմանին լարվածություն առաջ բերել, թե ոչ, Ռոբերտ Ղևոնդյանը նշեց, որ Թուրքիայի ներխուժումը, իր կարծիքով, չի կարող մոտիվացնել Ադրբեջանին՝ լարվածություն ստեղծել հայ-ադրբեջանական սահմանին. «Հաշվի առնենք, որ Մերձավոր Արևելքում տեղի ունեցող իրադարձություններն այնպիսին են, որ մեկ տեղում լարվածության շեշտակի աճը կլանում է միջազգային հանրության ուշադրությունը, և այս դեպքում մեկ այլ տեղ լարվածության աճ չի լինի, միջազգային հանրությունը թույլ չի տա»: Քաղաքագետի դիտարկմամբ՝ Ադրբեջանի համար սպասողական վիճակ է, պետք է տեսնի՝ Թուրքիան կհաջողի, թե ոչ, դրանից կախված՝ հնարավոր է լինեն զարգացումներ:
Հայաստանում ակտիվացել է հողեր հանձնելու վերաբերյալ կեղծ դիսկուրսը: Անդրադառնալով այս դիտարկմանը՝ Անդրիաս Ղուկասյանը նշեց, որ պարբերաբար այդ կեղծ դիսկուրսն ակտիվանում է, երբ որ սպասվում են իրադարձություններ բանակցային գործընթացում. «Ենթադրվում էր, որ բանակցային գործընթացը թավշյա հեղափոխությունից հետո կդառնար ավելի թափանցիկ, սակայն ավելի փակ դարձավ, անորոշ վիճակ է, բայց հողեր հանձնելու վերաբերյալ արտահայտություններն իրականության հետ աղերս չունեն»:
Մանրամասն՝ տեսանյութում: