Սիրիայի դեմոկրատական խորհրդի քաղաքական թևի՝ «Սիրիայի դեմոկրատական ուժերի» (SDF) համանախագահ Իլհամ Ահմեդը հայտարարել է, թե հարկավոր է, որ ԵՄ-ի երկրները Թուրքիայից հետ կանչեն դեսպաններին՝ տեղեկացնում է RIA Novosti-ն:
«Մենք խնդրում ենք ԵՄ-ի պետություններին, համաշխարհային հանրակցությանը Անկարայից հետ կանչել իրենց դեսպաններին»,- լրագրողներին ասել է Ահմեդը՝ գտնվելով Եվրախորհրդարանում:
Թուրքիայի նախագահ Էրդողանը հոկտեմբերի 9-ին հայտարարել է Սիրիայի հյուսիսում, այսպես կոչված, «Խաղաղության աղբյուր» գործողությունն սկսելու մասին, որը, ինչպես հայտարարվել է, ուղղված է Թուրքիայում արգելված Քրդստանի աշխատավորական կուսակցության և «ԴԱԻՇ» ահաբեկչական խմբավորման դեմ: Թուրքական օդուժը նույն օրը հարվածներ է հասցրել Ռաս Էլ Այն քաղաքին Սիրիայի Հասեկե նահանգում: Ավիահարվածների է ենթարկվել Թուրքիայի հետ սահմանին ևս մեկ սիրիական քաղաք՝ Թել Աբյադը:
Ավելի ուշ հայտարարվել է գործողության ցամաքային մասի սկսվելու մասին: Թուրքիայի պաշտպանության նախարարության վերջին տվյալների համաձայն՝ զինվորականները Սիրիայի հյուսիսում հարվածներ են հասցրել քրդական կազմավորումների 181 թիրախի: Սիրիայի հեռուստատեսության տվյալներով՝ Ռաս Էլ Այն, Ղամըշլի, Դարբասիա և Ալ Մաշրաֆա սահմանամերձ քաղաքների թուրքական գնդակոծման հետևանքով զոհվել է ութ խաղաղ բնակիչ, վիրավորվել է 20 մարդ:
