ԱՄՆ նախագահ Դոնալդ Թրամփն արդարացրել է ամերիկացի դիվանագետի կնոջը, որը Մեծ Բրիտանիայում վրաերթի է ենթարկել մոտոցիկլիստի և լքել երկիրը՝ օգտվելով դիվանագիտական անձեռնմխելիությունից, հայտնում է HuffPost պարբերականը:
ԱՄՆ նախագահը վթարն անվանել է «սարսափելի դժբախտ պատահար» և խոստացել, որ իր վարչակազմը կքննարկի դեպքը Էն Սաքուլասի հետ: Քաղաքական գործիչը ենթադրել է, որ ՃՏՊ-ի պատճառը կարող էր լինել երթևեկության կանոնների տարբերությունը. Մեծ Բրիտանիայում այն ձախակողմյան է, իսկ ԱՄՆ-ում՝ աջակողմյան:
ԱՄՆ նախագահը կիսել է բրիտանական հասարակության վրդովմունքը կատարվածի վերաբերյալ և հայտարարել, որ շատ ամերիկացիներ Սաքուլասի արարքը նույնպես վրդովեցուցիչ են համարել և ցանկանում են օգնել զոհվածի ընտանիքին: Սակայն նա չի մեկնաբանել դիվանագետի կնոջ դիվանագիտական անձեռնմխելիության կարգավիճակը:
Օգոստոսի 27-ին, Էն Սաքուլասը՝ դիվանագետ Ջոնաթան Սաքուլասի կինը, վրաերթի է ենարկել 19-ամյա մոտոցիկլիստ Հարի Դանին անգլիական Նորթհեմփթոնշիր կոմսությունում գտնվող Քրոութոն ավիաբազայի մոտակայքում և փախուստի դիմել պատահարի վայրից: Ենթադրաբար, նա մեքենան վարել է հանդիպակաց գոտում:
Բրիտանական ոստիկանությունը կնոջ դիվանագիտական անձեռնմխելիությունը վերացնելու վերաբերյալ միջնորդություն է ներկայացրել ամերիկյան դեսպանատուն, ինչը թույլ կտար հարցաքննել կասկածյալին: Դեսպանությունը անմիջապես Սաքուլասի ընտանիքին ուղարկել է Միացյալ Նահանգներ և մերժել միջնորդության բավարարումը:
Մեծ Բրիտանիայի ոստիկանությունը պահանջում է Էն Սաքուլասի վերադարձը քննչական գործողությունների անցկացման համար: Այս հարցը Մեծ Բրիտանիայի վարչապետ Բորիս Ջոնսոնը բարձրացրել է չորեքշաբթի օրը Թրամփի հետ ունեցած հեռախոսազրույցի ընթացքում: