Օրերս «Ժամանակ» օրաթերթը «Արմեն Գրիգորյանը մերժել է. Ինչ են խնդրել Հայկ Հարությունյանի հարազատները» վերտառությամբ լուր էր հրապարակել, որտեղ գրված էր, որ
նախկին ոստիկանապետ Հայկ Հարությունյանի հարազատները զանգահարել են ԱԽՔ Արմեն Գրիգորյանին և խնդրել, որ Հայկ Հարությունյանի հուղարկավորությունը տեղի ունենա ՀՀ բարձրաստիճան սպաների համար նախատեսված կարգի պահպանմամբ։ Խնդրել են, որ գոնե երկու ժամով պատվո պահակախումբ լինի շիրիմի մոտ։ Արմեն Գրիգորյանն էլ շատ կոպիտ կերպով մերժել է:
Լուրի հրապարակումից հետո Անվտանգության խորհրդի քարտուղար Արմեն Գրիգորյանը մեզ է ներկայացրել հերքման պահանջ: Ստորև հրապարակում ենք հերքման տեքստը․
Հրապարակված տեղեկությունը հիմնված չէ փաստերի վրա, այն ստույգ և իրական չէ և ապատեղեկատվություն է: Վերը նշված հրապարակումը որևէ ապացույց չի պարունակում այն մասին, որ մինչև հրապարակումը ներկայացված տեղեկատվության հավաստիությունը ստուգվել է: Ավելին՝ որպես տեղեկատվության հավաստիություն հաստատող հնարավոր միջոց՝ ես՝ որպես ՀՀ Անվտանգության Խորհրդի քարտուղար, նշված լրատվական միջոցներից կամ լրագրողներից որևէ զանգ կամ տեղեկատվությունը հաստատելու/հերքելու այլ դիմում չեմ ստացել: Բացի այդ՝ ՀՀ օրենսդրական կարգավորումների համաձայն՝ զինծառայողների, ինչպես նաև զինապարտների և քաղաքացիական այլ անձանց թաղման ժամանակ հարգանքի մատուցման ենթակա որոշումների կայացման առնչությամբ ՀՀ Անվտանգության Խորհուրդը որևէ լիազորություն չունի, ուստի այդ հարցի համար ես՝ որպես ՀՀ Անվտանգության Խորհրդի քարտուղար, չէի կարող նման դիմումի հասցեատեր հանդիսանալ:
Նման փաստական հիմքերի և իրավական կարգավորումների համատեքստում ակնհայտ է, որ նշված լրատվական միջոցները դուրս են եկել հանրային գերակա շահով պայմանավորված տեղեկատվության տարածելու, հանրային դիսկուրսը խթանելու իրենց առաքելությունից և ապատեղեկատվության՝ կեղծ, անճիշտ և ապակողմնորոշիչ տեղեկատվության տարածման միջոցով խեղաթյուրել են ՀՀ Անվտանգության Խորհրդի և իմ՝ որպես ՀՀ Անվտանգության Խորհրդի քարտուղարի գործառույթների և դրանց կատարման օրինականության վերաբերյալ հասարակական պատկերացումները:
Անվտանգության խորհրդի քարտուղար Արմեն Գրիգորյան
