Արցախի Ազգային անվտանգության խորհրդի նախկին քարտուղար Վիտալի Բալասանյանի հայտարարություններն ուսումնասիրում է Հայաստանի Ազգային անվտանգության ծառայությունը։
Բալասանյանը, հիշեցնենք, օրերս լրատվամիջոցներից մեկին տված հարցազրույցում, քննադատելով «Սասնա ծռեր» կուսակցության և վարչապետ Նիկոլ Փաշինյանի միջև տեղի ունեցած հանդիպումը, սպառնացել է ֆիզիկապես ոչնչացնել նրանց, ովքեր իր իսկ խոսքերով՝ ոտնձգություն կանեն իր, Արցախի իշխանության և պետականության դեմ:
«Սասնա ծռեր» կուսակցությունը պատասխան հայտարարություն էր տարածել՝ նշելով, որ Վիտալի Բալասանյանը իր և ամբողջ 5-րդ շարասյան անունից բազմիցս հանդես է եկել հաշվեհարդարի և ֆիզիկական բռնության սպառնալիքներ պարունակող հայտարարություններով: Կուսակցությունը նաև խիստ մտահոգիչ և տարակուսելի է համարել այն փաստը, որ ՀՀ իրավապահ մարմինները մինչ օրս որևէ քայլ չեն ձեռնարկել այդ սպառնալիքների իրագործման հավանականությունը ստուգելու և քաղաքացիների ու պետության նկատմամբ դրանց հավանական գործադրումը կանխելու ուղղությամբ:
«Առաջին լրատվական»-ի հետ զրույցում անդրադառնալով ԱԱԾ-ի կողմից Բալասանյանի հայտարարություններն ուսումնասիրելու հանգամանքին՝ «Սասնա ծռերի» քարտուղար անդամ Վահագն Ավագյանը նշեց. «Ճիշտն ասած՝ մեզ տեխնիկական մասը չի հետաքրքրում, թե իրավապահ որ մարմինը ինչ հիմք տեսնելով որտեղ ուղարկեց գործը, ներքին կանոնակարգային ինչ խնդիրներ տեսան մյուս մարմնում ու ինչ ընթացք տվեցին։ Մեր հայտարարությունն այդ թեմայով եղել է, և ամեն ինչ հստակ է։ Այստեղ գործ չունենք կոնկրետ ինչ-որ մի անձի ոչ ադեկվատ գործողությունների ու քրեական հայտարարությունների հետ։ Մենք գործ ունենք մի ամբողջ հինգերորդ շարասյան կազմակերպված գործողությունների հետ, որոնք կաշկանդված չեն բռնության ու զինված հեղաշրջումների կոչ անելու հարցում»։
Մեր զրուցակիցն ընդգծեց՝ դա պետք է հանդիպի գործող հեղափոխական իշխանությունների կոշտ պատասխանին, ու այդ անձինք պետք է շատ արագ մեկուսացվեն: «Թե գործող իշխանությունները որքանով ադեկվատ ու առկա իրողություններին համապատասխան կարձագանքեն՝ ժամանակը ցույց կտա։ Իհարկե՝ ամեն հաջորդ ժամը ընդդեմ մեր ժողովրդի ու մեր իշխանությունների է»,- ասաց Ավագյանը։
Վահագն Ավագյանը շեշտեց՝ իրենք վաղուց են ասել, թե ինչ քայլեր է պետք ձեռնարկել նախկինների ռևանշը կանխելու և արդարադատություն հաստատելու համար. «1.5 տարի մենք ասել ենք՝ այն քաղաքական գործիքը, որը ժողովուրդը պետություն ստեղծելիս տալիս է իշխանություններին, այսինքն՝ իրավապահ համակարգի այն գործիքը, որը կոչված է պաշտպանելու ժողովրդի կողմից օրինական ձևավորված իշխանություններին ռազմական հեղաշրջման և նմանատիպ այլ ապօրինի տապալումներից, այդ գործիքն այսօր մասամբ և համակարգային առումով նախկին ռեժիմից կազմված գաղութային համակարգի տրամաբանությամբ գործող համակարգ է, որն ինքը առաջին հերթին ուղղվելու խնդիր ուներ»։
Դրա վառ օրինակն, ըստ մեր զրուցակցի, ԱԱԾ արդեն նախկին պետ Արթուր Վանեցյանի՝ հեղափոխությունից կարճ ժամանակ անց ցատկն էր դեպի հինգերորդ շարասյան առաջին գիծ. «Դա շատ պարզ ցույց է տալիս, որ այստեղ կա համակարգային խնդիր, ու պետք է համակարգային ձևով լուծել խնդիրը։ Մենք բազմիցս մեր հայտարարություններով ցույց ենք տվել և՛խնդրի պատճառները, և՛ լուծման ուղղությունները։ Այդ առումով նոր բան այս պահին ասել չեմ կարող»։
Լուսանկարը՝ Photolure-ի
