Եգիպտացորենի դաշտում վթարային վայրէջք կատարած Airbus A321 ինքնաթիռի անձնակազմը հանդիպել է փրկված ուղևորների հետ: Այս մասին Instagram-ի իր էջում հայտնել է բորտուղեկցորդուհի Ալիա Սլյակաևան:
Մասնավորապես, անձնակազմի և ուղևորների համար հատուկ տորթ է պատրաստվել, որը թեմատիկ ձևավորում է ունեցել. Երկրագնդի վրա եգիպտացորենի դաշտ, որի վերևում եղել է «Ուրալյան ավիաուղիների» Airbus A321 ինքնաթիռի կրկնօրինակը:
«Ես ասել եմ, ասում եմ և կասեմ, որ մեր բախտը բերել է ուղևորների հարցում: Շնորհակալություն այդ օրվա համար. զսպվածության, ուշադրության և օպերատիվության համար, և շնորհակալություն մեր այսօրվա համար»,- գրել է նա:
2019-ի օգոստոսին չվերթի ժամանակ «Ուրալյան ավիաուղիների» Airbus A321 ինքնաթիռն արտակարգ վայրէջք է կատարել: Վթարային իրավիճակն առաջացել է ինքնաթիռի շարժիչներում թռչունների հայտնվելուց հետո, ինչը բռնկման պատճառ է դարձել: Օդանավի անձնակազմը, Դամիր Յուսուպովի հրամանատարությամբ, կարողացել է բարեհաջող վայրէջք կատարել եգիպտացորենի դաշտում: Բոլոր ուղևորներն ու անձնակազմը ողջ են մնացել: ՌԴ նախագահի հրամանագրով Յուսուպովին և օդաչու Գեորգի Մուրզինին շնորհվել է Ռուսաստանի հերոսի կոչում, իսկ անձնակազմի մնացած անդամները «Արիության շքանշան» են ստացել: