Թուրքական զինված ուժերի օդային հարվածի թիրախ է դարձել բանտը, որտեղ գտնվել են «Իսլամական պետություն» խմբավորման գերեվարված զինյալները: Զինված ընդդիմության ներկայացուցիչները կարծում են, որ դա արվել է դիտավորյալ՝ տարածաշրջանում քրդական ուժերին վնաս հասցնելու համար, հաղորդում է Al-Masdar News-ը:
Ըստ Reuters-ի, բանտը գտնվում է Էլ-Քամիշլի շրջանում՝ սիրիա-թուրքական սահմանի մոտ:
«Այն բանտերից մեկը, որտեղ պահվում են ԻՊ գերիները, ենթարկվել է թուրքական օդուժի հարվածների: Թուրքիան փորձում է ոչնչացնել մեր բոլոր ձեռքբերումները ԻՊ-ի դեմ պայքարում»,- պարբերականը մեջբերում է Սիրիայի դեմոկրատական ուժերի (քրդական և արաբական խմբավորումների միություն) հայտարարությունը: Խմբավորման ներկայացուցիչները պնդում են, որ բանտը թիրախավորվել է հատուկ՝ զինյալներին ազատ արձակելու նպատակով:
Ավելի վաղ, Թուրքիայի նախագահ Ռեջեփ Թայիփ Էրդողանը հայտարարել է «Խաղաղության աղբյուր» գործողության մեկնարկի մասին, որի նպատակը քուրդ զինյալների և ԻՊ խմբավորման ահաբեկիչների դեմ պայքարն է: Ըստ Թուրքիայի ղեկավարի, ռազմական գործողությունների նպատակը Թուրքիայի հարավային սահմանների մոտակայքում գտնվող ահաբեկիչների կողմից վերահսկվող գոտու ոչնչացումն է՝ Սիրիայում խաղաղություն հաստատելու նպատակով:
