Ի՞նչ է կատարվում տեղեկատվական տիրույթում: Այսօր արդեն կոշտ բնորոշումներ են տրվել՝ տեղեկատվական պատերազմ, տեղեկատվական դիվերսիա: Թեմայի շուրջ «Առաջին լրատվական»-ի հետ քննարկմանը մասնակցեցին «Քաղաքացու որոշում» կուսակցության գործադիր մարմնի անդամ Հայկ Սահակյանը, ԱԺ «Իմ քայլը» խմբակցության պատգամավոր Սոս Ավետիսյանը և քաղաքագետ Արմեն Վարդանյանը:
Ի՞նչ նպատակ կարող է հետապնդել տեղեկատվական այս աղմուկը, որ ձևավորվում է և՛ Հայաստանում, և՛ Արցախում: Հայկ Սահակյանի խոսքով՝ Արցախում նախագահական ընտրություններին ընդառաջ մարդիկ դիրքավորվել են և փորձելու են Հայաստանից օժանդակություն ստանալ, իսկ Հայաստանը հայտնել է իր պաշտոնական դիրքորոշումը՝ չի խառնվելու Արցախի ներքին գործերին:
Արմեն Վարդանյանի դիտարկմամբ՝ տեղի ունեցողն ինչ-որ առումով բնականոն է, որովհետև նախկին ռեժիմը ոչ միայն իշխանություն է կորցրել, այլ նրանցից մի քանիսը հայտնվել են բանտում կամ բանտում հայտնվելու, միլիոնավոր դոլարներ կորցնելու վտանգի առաջ են, և ստեղծված պայմաններում նրանք որևէ հնարավորություն չունեն իշխանությունը վերցնելու, նրանց միակ ճանապարհը մնում է իշխանության դեմ տեղեկատվական պատերազմ սանձազերծելը: Հայաստանի դեմ հիբրիդային պատերազմ է սանձազերծվել, և դա մի քանի ուղղություններով է գործում:
«Այս կամ այն տոնայնությամբ հայտարարություններ անընդհատ լինում են, շատ կարևոր է տեսնել, թե ովքեր են «պապաները»՝ ովքեր են այս «հերոսների տերերը»,- նշեց Սոս Ավետիսյանը:- Հնարավոր այլ ճակատներում կռիվ անելու տեղ չունեն, իշխանությանը դժվար է մեղադրել կոռուպցիայի, ընտրություններ կեղծելու և այլնի մեջ, այսինքն՝ բոլոր կռվանները, որ եղել են, ի չիք են դարձել: Այս ամբողջ «պատերազմը» ապակենտրոնացման տրամաբանությամբ է, բայց նեգատիվ: Իրականում մի խումբ է, որն աշխատում է տարբեր ուղղություններով՝ փորձելով իշխանությանը ներքաշել ինտրիգների մեջ»:
Անդրադառնալով դիտարկմանը, որ Վիտալի Բալասանյանի կողմից Livenews.am-ին տված հարցազրույցի տեսանյութը ՀՀ գլխավոր դատախազի գրությամբ ուղարկվել է ԱԱԾ`դրանում նշված հանգամանքները ստուգելու նպատակով, Արմեն Վարդանյանը նշեց, որ ժողովրդավարական պետության միակ ճանապարհը իրավական ճանապարհն է, ռեպրեսիաների ժամանակն անցել է: «Իմ կարծիքով՝ Վ. Բալասանյանը սխալ մարդկանցով է շրջապատված: Նա դիտավորյալ է սրում իրավիճակը»,- ընդգծեց քաղաքագետը:
Մանրամասն՝ տեսանյութում: