«Ցանկացած գործիչ կարող է ցանկացած հայտարարություն անել, սակայն Ռոբերտ Քոչարյանին «քաղբանտարկյալ» ճանաչելիս պետք է հաշվի առնել, որ նույնիսկ դատավարությունը դեռ չի սկսվել: Թող դատավարությունը սկսվի, Ռոբերտ Քոչարյանն իր պատիժը ստանա, որից հետո կվերլուծենք. գործը պետք է անցնի ամբողջ երեք-չորս ատյաններով»,- «Առաջին լրատվական»-ի հետ զրույցում նշեց Գլոբալիզացիայի և տարածաշրջանային համագործակցության վերլուծական կենտրոնի տնօրեն Ստեփան Գրիգորյանը՝ անդրադառնալով Ռոբերտ Քոչարյանին աջակցող որոշ գործիչների կողմից ստորագրված հայտարարությանը:
Մեր զրուցակիցը բավականին մտահոգիչ է համարում այն արհեստական լարվածությունը, որ ստեղծում են նախկին իշխանությունների բեկորները, այդ թվում՝ լրատվամիջոցները. «Սա շատ նման է նրան, ինչ եղել է Ուկրաինայում: Այնտեղ, սակայն, լուծումը փայլուն կերպով գտան. Ռադան հավաքվեց և Յանուկովիչին զրկեց նախագահի կարգավիճակից, քանի որ քո ժողովրդի սուվերենության զիջումը լուրջ հանցագործություն է»:
Այս համատեքստում զուգահեռ տանելով Հայաստանի հետ՝ Ստեփան Գրիգորյանն ասաց. «Այսօր մենք չունենք ՀԷԿ-եր, չունենք գազի մեկ խողովակ, չունենք երկաթգիծ: Այսպիսով՝ մենք տեսնում ենք, որ ՀՀ վերջին երկու նախագահները իրոք զիջում էին հայ ժողովրդի սուվերենությունը, ինչը մեր հնարավորություններն այսօր խիստ սահմանափակում է»:
Նրա խոսքով՝ կոռուպցիայի հարցը հնարավոր է շտկել, բայց այն, ինչ տրվել է օտարին, շտկելը շատ դժվար է: «Իմ կարծիքով՝ «Իմ քայլի» պատգամավորները պետք է հարց բարձրացնեն՝ այս մարդիկ իրավունք ունե՞ն պահպանելու նախկին նախագահի կարգավիճակը՝ ստանալով հատուկ թոշակներ, անհատական մեքենաներ, ապահովված լինելով անվտանգությունով»,- նշեց նա և հավելեց, որ խնդիրը անձնական չէ՝ խոսքը նախադեպի մասին է:
Հարցազրույցն ամբողջությամբ՝ տեսանյութում:
