Երկուշաբթի օրը խոշոր գործարարների հետ հանդիպման ժամանակ Ռուսաստանի նախագահ Դմիտրի Մեդվեդևը հայտարարել է, որ գործարարների համար «եկել է ժամանակը կողմնորոշվելու»՝ ո՞ւմ են նրանք ցանկանում նախագահ տեսնել՝ Պուտինի՞ն, թե՞ իրեն: Այս մասին գրում է Vedomosti թերթը՝ հղում անելով հավաքի մասնակիցներից մեկին:
Ոչ ոք այդ օրը չի ակնկալել, որ զրույց կընթանա քաղաքականության մասին, սակայն նախագահն անսպասելիորեն արծարծել է այդ թեման: Նա իրեն համեմամտել է Պուտինի հետ, և նրա խոսքերից հետևել է, որ վերջին տարիներին երկիրը զարգացել է Պուտինի առաջարկած ուղով, իսկ ինքն արդեն հայտարարել է իր նոր ծրագրի մասին Պետերբուրգի տնտեսական համաժողովի ժամանակ: Մեդվեդևն ասել է, որ գործարարները պետք է կողմնորոշվեն, թե որ ճանապարհով է զարգանալու երկիրն ապագայում:
Մեդվեդևը նաև զգուշացրել է, որ եթե նրանք ինքները չփոխեն զարգացման սցենարը, ապա այն կփոխի ինչ որ մեկը. «Նախագահը նրբորեն և միանշանակ հասկացրեց, որ եկել է ժամանակը, որպեսզի բիզնեսը որոշի, թե ում է ցանկանում նախագահ տեսնել՝ Մեդվեդևի՞ն, թե՞ Պուտինին, ո՞ւմ է աջակցելու: Դա այնքան անսպասելի էր, որ ես պարզապես ապշեցի»,- հայտարարել է հավաքի մասնակիցներից մեկը, որը չի ցանկացել ներկայանալ: Հավաքի մեկ այլ մասնակից Մեդվեդևի ուղերձը նմանապես է հասկացել՝ նշելով, որ գործարարները դրանից հետո սկսել են կատակել. «Իսկ դու արդեն կողմնորոշվե՞լ ես»:
Vedomosti-ն փորձել է մեկնաբանություններ ստանալ Կրեմլից, որտեղ մի պաշտոնյա ասել է, որ կոշտ ձևակերպումներ չեն եղել, այլապես Պուտինին միանգամից կզեկուցեին, որ Մեդվեդևն իրեն հակադրվում է: Իսկ նախագահի խոսնակ Նատալյա Տիմակովան հայտարարել է՝ նախագահը հասկանում է, որ բիզնեսն ազդանշանների է սպասում, և հանգստացրել է ներկաներին՝ կա կուրս, որը շարունակվելու է: