Արցախի արտգործնախարար Մասիս Մայիլյանը որոշել է առաջադրվել Արցախի Հանրապետության նախագահի 2020թ. ընտրություններում։ Այս մասին նա գրառում է կատարել իր ֆեսբուքյան էջում։ ԱՀ արտգործնախարարը նշում է, որ եկել է համազգային օրակարգ ձևավորելու և նոր Արցախ կերտելու ժամանակը: Մասիս Մայիլյանի որոշումն ու հայտարարությունը փաստացի նոր հասարակական-քաղաքական իրավիճակ են ստեղծում Արցախի նախագահի ընտրությանն ընդառաջ: Մինչ այդ ինտրիգ էր հյուսվում առավելապես նախկին իշխող տնտեսաքաղաքական համակարգի դերակատարների միջև:
Թեմայի շուրջ «Առաջին լրատվական»-ի հետ քննարկմանը մասնակցեցին «Քաղաքացու որոշում» կուսակցության անդամ Գարեգին Միսկարյանը, վերլուծաբան Մհեր Ղալեչյանը և ԱԺ «Իմ քայլը» խմբակցության պատգամավոր Մարիա Կարապետյանը:
Գարեգին Միսկարյանի դիտարկմամբ՝ Մասիս Մայիլյանը նոր շունչ կհաղորդի ընտրապայքարին. «Նրան համարում եմ բանիմաց և խելացի անձ և կարծում եմ, որ նրա առաջադրվելը դրական քայլ է և՛ Արցախի համար, և՛ Արցախի ժողովրդավարության համար»:
Մհեր Ղալեչյանի կարծիքով՝ մյուս թեկնածուները դիտարկվում են որպես նախկին համակարգի ներկայացուցիչներ, իսկ Մասիս Մայիլյանը, թեև ԱՀ գործող արտգործնախարարն է, սակայն չի ասոցացվում Արցախի իշխանությունների հետ: «Մասիս Մայիլյանը մինչ այսօր դիրքորոշում չի հայտնել հայաստանյան զարգացումների վերաբերյալ, և կարծում եմ, որ նրա նկատմամբ հասարակական դրական տրամադրվածություն կառաջանա Հայաստանում, ինչն ազդեցություն կունենա, և նա լուրջ աջակցություն կունենան նաև Արցախում»,- նշեց Մ. Ղալեչյանը՝ հավելելով, որ նրա առաջադրվելը կարող է Արցախում ինտրիգն ավելի սրել:
Մարիա Կարապետյանի կարծիքով՝ շատ կաևոր է, որ Արցախում նույնպես տեղի ունենա այն, ինչ Հայաստանում, այսինքն՝ ռազմական էլիտաները, ուժային կառույցների ղեկավարները, ինչպես նաև տնտեսությունն ու քաղաքականությունն իրար խառնած քաղաքական գործիչները դուրս մղվեն, կառավարության մեջ ներկայացված չլինեն:
Քննարկման մասնակիցներն անդրադարձան նաև Հայաստանի ներքաղաքական զարգացումներին: Գ. Միսկարյանը նշեց, որ, իր կարծիքով, ներքաղաքական դաշտում մարտահրավերներ են սպասվում: Մհեր Ղալեչյանը հավելեց, որ պետք է ամեն ինչ անել, որ բացառվի հին Հայաստանի վերադարձի որևէ շանս:
Անդրադառնալով նախկին ոստիկանապետի՝ վարչապետի գլխավոր խորհրդականի պաշտոնից հրաժարականին՝ Գարեգին Միսկարյանը նշեց, որ ի սկզբանե դեմ է եղել խորհրդականի պաշտոնում նրա նշանակմանը, քանի որ. «Վ. Օսիպյանը ոստիկանության համակարգի բարեփոխումները տապալած անձ է… Այն ինչ եղավ, նրա վատ աշխատանքի հետևանքն էր»:
Մանրամասն՝ տեսանյութում: