«Օգնություն ժողովրդավարության պաշտպանությանը» հասարակական միության նախագահ, իրավապաշտպան Վիդադի Իսգենդերլիի` Գյոյչայում գտնվող տան վրա հարձակում է տեղի ունեցել: «Ենի Մուսավաթին» տված հայտարարության մեջ Վ.Իսգենդերլին հայտնել է, որ իր բացակայության ժամանակ Ալիիսա անունով թաղային լիազորն ու երկու անհայտ անձինք հարձակվել են տան վրա և աքացիներով ջարդել դուռը: «Իմ բացակայության ընթացքում նրանք փորձել են ներխուժել տուն և առևանգել նոյեմբերի 7-ի խորհրդարանական ընտրությունների ժամանակ տեղի ունեցած կեղծարարություններն ապացուցող 200-ից ավելի փաստաթղթեր: Այդ փաստաթղթերում ապացուցվում է Ադրբեջանի իշխող «Ենի Ազերբայջան» կուսակցության թեկնածու Շամսեդդին Հաջիևի օգտին արված կեղծարարությունը: Ես ապացուցելու եմ նրա՝ կեղծ ճանապարհով պատգամավորի մանդատ ստանալու փաստը»,- հայտարարել է Վ.Իսգենդերլին: Դեպքի հետ կապված՝ իրավապաշտպանը դիմել է ներքին գործերի նախարար Ռամիլ Ուսուբովին և Ադրբեջանի նախագահ Իլհամ Ալիևին: Վ.Իսգենդերլին դիմումում հայտնել է, որ իրեն հետապնդում են այն բանի համար, որ Ադրբեջանի հանրային հեռուստատեսությամբ խոսել է թիվ 89 Գյոյչայ-Աղդաշ ընտրական շրջանում տեղի ունեցած կեղծարարությունների մասին:
«Ինձ անընդհատ ճնշումների են ենթարկում ինչ- որ անհեթեթ հիմնավորումներով: Օրինակ՝ ասում են, որ ես Բաքվում բնակվում եմ անօրինական բնակարանում, այնինչ այդ բնակարանը քրոջս 17 տարի առաջ սեփականաշնորհած բնակարանն է: Ինձ մեղադրում են այն բանում, իբր գողացել եմ ընտրատեղամասի աշխատակիցների` ինչ-որ տուփում դրված ոսկեղենը: Ընդ որում, ծիծաղելին այն է, որ այդ մասին խոսում են ընտրությունների ավարտից 13 օր հետո: Այս ամենի հետևում տրանսպորտի նախարար Զիյա Մամեդովն ու գլխավոր դատախազ Զաքիր Գարալովն են կանգնած: Այդ պատճառով էլ դիմում եմ նախագահին, որ նա այդ ապօրինություններին վերջ դնելու հանձնարարություն տա», – ասել է իրավապաշտպանը: Վ.Իսգենդերլին դիմել է նաև Ադրբեջանի Կենտրոնական ընտրական հանձնաժողովի նախագահ Մազահիր Փանահովին և պահանջել չեղյալ համարել թիվ 89 ընտրական շրջանում տեղի ունեցած ընտրությունների արդյունքները:
