Թավշյա հեղափոխությունից հետո Հայաստանի պետական տնտեսագիտական համալսարանի բախտը չի բերում։ Հեղափոխությունից ամիսներ անց, սեփական դիմումի համաձայն, համալսարանին հրաժեշտ տվեց նախկին ռեկտոր Կորյուն Աթոյանը, որը համարվում էր ՀՀ երրորդ նախագահ Սերժ Սարգսյանի մտերիմ անձանցից մեկը։ Համալսարանի պաշտոնակատար նշանակվեց երիտասարդ դոկտոր Ռուբեն Հայրապետյանը։ Սակայն կարճ ժամանակ անց Ռուբեն Հայրապետյանը հայտնվեց սկանդալների կիզակետում․ նրանից սկսեցին բողոքել այն դասախոսները, որոնցից ազատվելու համար նորաթուխ ռեկտորի պաշտոնակատարը ուղիներ էր որոնում՝ պահանջելով, օրինակ, անգլերենի իմացություն։
Դատի տվեցին, բողոքեցին, հետո պարզվեց, որ Ռուբեն Հայրապետյանի դոկտորական աշխատանքից էլ դժգոհություններ ունեն։ Ռուբեն Հայրապետյանի դոկտորական ատենախոսության թեման է «Մասնակցային կառավարման զարգացման ուղղությունները տեղական ինքնակառավարման համակարգում»։ Կրթության, գիտության, մշակույթի և սպորտի նախարար Արայիկ Հարությունյանի հրամանով ստեղծվել էր հանձնաժողով, որն ուսումնասիրեց ՀՊՏՀ մի շարք աշխատակիցների՝ ՀՀ վարչապետին ուղղված նյութերը։ Այդ աշխատանքները համակարգել է Բարձրագույն որակավորման կոմիտեն։ Իսկ օգոստոսի վերջերին էլ Բարձրագույն որակավորման կոմիտեն հրապարակեց ՀՊՏՀ ռեկտորի նախկին պաշտոնակատար Ռուբեն Հայրապետյանի դոկտորական ատենախոսության եզրակացությունը՝ հաստատելով, որ դրանում տեղ են գտել տարբեր աղբյուրներից և հեղինակներից փոխառված նյութեր՝ առանց համապատասխան հղումների։ ԲՈԿ-ը նշել էր, որ իրականացվել է տրամադրված նյութերի և ատենախոսության համապատասխան մասերի համադրական ուսումնասիրություն։ Արդյունքում պարզվել է, որ համեմատված հատվածների գերակշիռ մասում առկա են այլ հեղինակներից և աղբյուրներից փոխառված նյութեր՝ առանց համապատասխան հղումների։ Իսկ փոխառությունների ծավալը բավականաչափ մեծ է, որն ընդգրկում է ատենախոսության ոչ միայն տեսական մասը։
Եզրակացությունից հետո ի՞նչ է սպասվում Ռուբեն Հայրապետյանին, նրան զրկելո՞ւ են դոկտորի կոչումից։ Այս հարցն ուղղեցինք Բարձրագույն որակավորման կոմիտեի նախագահ Սմբատ Գոգյանին։
«ԲՈԿ-ը գործ ունի միայն տվյալ պահին պաշտպանվող ատենախոսությունների հետ, միայն այդ պահին տրված և այդ պահին մերժվող աստիճանների համար։ Թե անցյալում ինչ է եղել՝ դա մեր կանոնադրական լիազորություններից դուրս է, չենք էլ կարող մերժել նույնիսկ փաստերի առկայության դեպքում։ Մենք կարող ենք դիմել վարչական դատարան և դատական պրոցեսի արդյունքում զրկել կոչումից։ Բայց ԲՈԿ-ն ինքն իրեն չի կարող դատի տալ»,- ասաց Սմբատ Գոգյանը։
Ռուբեն Հայրապետյանին փոխարինեց Դիանա Գալոյանը, որն այս պահի դրությամբ ՀՊՏՀ ռեկտորի պաշտոնակատարն է։ Պարզվում է, սակայն, որ Դիանա Գալոյանին էլ են կասկածում դոկտորական ատենախոսությունում արտագրություններ կատարելու մեջ։
Մամուլում այդ մասին եղել են արդեն հրապարակումներ։ ՀՊՏՀ մի խումբ ուսանողներ նյութեր են տրամադրել՝ հավաստելով, որ Դիանա Գալոյանի որոշ հոդվածներ արտագրություն են։
ԲՈԿ նախագահ Սմբատ Գոգյանն այս մասին տեղեկացրեց, որ Դիանա Գալոյանի ատենախոսությամբ իրենք չեն զբաղվում։
Իսկ կրթության, գիտության, մշակույթի և սպորտի նախարար Արայիկ Հարությունյանն էլ սեպտեմբերի 30-ին «Ազատություն» ռադիոկայանի «Ֆեյսբուքյան ասուլիս»-ում, ի պատասխան Դիանա Գալոյանի մասին իրեն ուղղված հարցերի, նշեց, որ իր հրամանով ստեղծվել է իդենտիկ հանձնաժողով, ինչպիսին ստեղծվել էր Ռուբեն Հայրապետյանի դոկտորական ատենախոսությունն ուսումնասիրելու համար։
«Գրագողությունն անընդունելի է, գրագողը չի կարող լինել հայաստանյան բուհի ռեկտոր։ Ցանկացած փաստի դեպքում լինելու են հետևանքներ։ Կապ չունի, թե ես ինչ հարաբերություններ ունեմ X մարդու հետ։ Եթե ես տեսնում եմ խնդիրներ, ապա դրանք անհետևանք մնալ չեն կարող»,- ի մասնավորի ասել էր Արայիկ Հարությունյանը։
Կրթության, գիտության, մշակույթի և սպորտի նախարարությունից փորձեցինք տեղեկանալ, թե ինչ ընթացքի մեջ են հանձնաժողովի աշխատանքները, ինչ են պարզել, երբ կտրվի եզրակացություն։ Մեզ խորհուրդ տվեցին հարցերն ուղարկել գրավոր, որոնց կպատասխանեն ավելի ուշ։
Կրթության, գիտության, մշակույթի և սպորտի նախարարությունից ավելի ուշ ստացանք հետևյալ պատասխանը․ «Հանձնաժողովն իր եզրակացությամբ արձանագրել է, որ քննության առարկա հինգ դեպքերից մի մասում առկա են որոշ համընկնումներ, իսկ մյուսներում՝ տեխնիկական թերություններ: Արդյունքում, խնդրո առարկա հրապարակումների բովանդակության ամբողջական ուսումնասիրությունը հիմք է տալիս հավաստելու, որ հիշատակված թերությունները հրապարակումների բովանդակային արժեքի վրա ազդեցություն չեն ունեցել»։