ՀՀ վաստակավոր արվեստի գործիչ, ռեժիսոր, Կինոյի և հեռուստատեսության ամբիոնի վարիչի պաշտոնակատար Հրանտ Մովսիսյանը Երևանի թատրոնի և կինոյի պետական ինստիտուտի ռեկտոր Լիլիթ Արզումանյանին աշխատանքից ազատելու դիմում է ներկայացրել և որպես պատճառ նշել վիրավորական ցածր աշխատավարձը:
«Առաջին լրատվական»-ի հետ զրույցում Հրանտ Մովսիսյանը նշեց, որ իր աշխատավարձն այս տարի կազմում էր ամսական 28 300 դրամ: «Մատաղ սերնդին կրթելու համար պետք է ստանամ 28 300 դրամ, ես հաշվեցի և հասկացա, որ յուրաքանչյուր ուսանողին կրթելը կազմում է 1000 դրամ… Ի՞նչ կարելի է անել դրանով մեկ ամսվա ընթացքում՝ լույս ու գազ չօգտագործել, հեռախոս չունենալ, մեքենա չվարել, թաքնվել, մի թեթև սնվել ու քնել… Պատճառը վիրավորանքս է, կարծում եմ դասախոսի համար, լինելով կուրսի ղեկավար, դա շատ քիչ աշխատավարձ է… Ավելի լավ է հրաժարվել դրանից, ձրի դասավանդել, բայց ամեն ինչը մարդավարի անել: Ես փորձել եմ այսքան տարիների ընթացքում ինչ-որ բան թողնել այս երկրի համար, արած գործեր ունեմ, և էլի անելիքներ ունեմ…»,-նշեց ռեժիսորը:
Հ. Մովսիսյանի կարծիքով՝ ինստիտուտն ուսանողին առավելագույնը 20 տոկոս կարող է գիտելիք տալ, շատ ավելի կարևոր է պրակտիկան, և որ ինքն ուսանողներին ակտիվ պրակտիկ աշխատանքների է տարել, նրանք մասնակցել են նկարահանումներին, սակայն, չգիտես ինչու, այս տարի պրակտիկան հանվել է:
«Խնդիրն այն է, որ գալիս ես բուհ, ու չեն հարգում քեզ՝ ասելով ժամերդ քիչ է: Ու ես որոշեցի հրաժարվել այդ ժամերից ու այդ փողից»,- նշեց մեր զրուցակիցը՝ ևս մեկ անգամ կարևորելով, որ անհրաժեշտ է ուսանողների հետ ակտիվ պրակտիկ աշխատանքը, որը ձևավորում է ճաշակ, մտածելակերպ:
Մանրամասն՝ տեսանյութում: