ՀՀ երկրորդ նախագահ Ռոբերտ Քոչարյանի ոչ պաշտոնական կայքի՝ 2rd.am-ի ձեռքի տակ է հայտնվել հայտարարություն, որին միացել են հասարակական, քաղաքական, մշակույթի, սպորտի մի քանի տասնյակ գործիչներ: Նրանք մտահոգություն են հայտնում առ այն, որ Հայաստանի դատաիրավական համակարգի, դատավորների և ՍԴ-ի հանդեպ «բիրտ ճնշումներ» են իրականացվում, և որ հայկական երկու պետությունների անվտանգությունը խիստ սպառնալիքի տակ է՝ «չսթափվելու» դեպքում:
Այս առնչությամբ փաստաբան Նորայր Նորիկյանը «Առաջին լրատվական»-ի հետ զրույցում ասաց. «Ակնհայտ է, որ Ռոբերտ Քոչարյանի և նրա աջակիցների շրջանակի կողմից հանրությանն են անընդհատ փաթեթավորվում և տրամադրվում տեղեկություններ, քայլեր, ակցիաներ, որոնց միջոցով փորձ է արվում Ռոբերտ Քոչարյանի կերպարը մի կողմից՝ ասոցացնել Արցախի պետության, ինքնիշխանության և ընդհանրապես՝ հակամարտության հետ, մյուս կողմից՝ փորձ է արվում Ռոբերտ Քոչարյանից կերտել քաղաքական հալածյալ: Բնականաբար, ես կտրականապես համաձայն չեմ այդպիսի գնահատականների հետ՝ շատ պարզ պատճառաբանությամբ. Քոչարյանին առաջադրված մեղադրանքների բովանդակությունը, բնույթը, ծավալը խոսում են այն մասին, որ ՀՀ-ում 2008թ. Քոչարյանի պաշտոնավարման մայրամուտին տեղի են ունեցել այնպիսի գործընթացներ, որոնք հիմք են տվել այսպիսի մեղադրանք առաջադրելու»:
Նորայր Նորիկյանը վիրավորական է համարում այն արտահայտությունը, որ Ռոբերտ Քոչարյանին մեղադրանք առաջադրելով կամ նրան անազատության մեջ պահելով՝ կարող է վտանգի տակ դրվել Հայաստանի և Արցախի անվտանգությունը. «Ընդհանրապես որևէ պետության համար կործանարար կլինի, որ որևէ անձով պայմանավորված լինի այդ պետության անվտանգությունը: ՀՀ-ն իր զինված ուժերով և իր անվտանգության մնացած բաղկացուցիչ մասերով պատրաստ է և ամենակարևորը՝ ունակ է ապահովել Հայաստանի Հանրապետության անվտանգությունը»:
Փաստաբանը, ի գիտություն նշված անձանց, ասաց. «Արցախի անվտանգության երաշխավորը ՀՀ ազգային անվտանգության ռազմավարության հայեցակարգով սահմանված կարգով՝ Հայաստանի Հանրապետությունն է: Ուստի Ռոբերտ Քոչարյանի անձով և նրա հետագա կարգավիճակով պայմանավորել կամ վտանգի տակ տեսնել ՀՀ-ի և Արցախի Հանրապետության անվտանգությունը ուղղակի մեծամտություն է, չարդարացված կամ չափազանցված գնահատական է, ինչը չի բխում ՀՀ-ում իրականացվող գործընթացներից և ՀՀ ժողովրդի շահերից»:
Փաստաբանի խոսքով՝ ստացվում է, որ ինչ կատարվում է Քոչարյանի շուրջ, անօրինական է. «Այնպիսի մտայնություն է հրամցվում հանրությանը, որ այս ամբողջ պրոցեսը ապօրինության դաշտում է: Դատավարության վերջնարդյունքում մենք կունենանք բոլոր հարցերի պատասխանները, որոնք այսօր գտնվում են օդում: Բայց ես հեռու եմ այն մտքից, որ Ռոբերտ Քոչարյանը և նրա աջակիցները չեն փորձելու այս դատավարությանը զուգահեռ կառուցել այսպիսի արհեստական օրակարգ, և հասկանում եմ, որ այդ շրջանակները առաջադրված մեղադրանքի տակից դուրս գալու ուրիշ ելք էլ չունեն»:
Հարցազրույցն ամբողջությամբ՝ տեսանյութում: