Հոկտեմբերի 12-ին ֆուտբոլի Հայաստանի ազգային հավաքականը 7-րդ հանդիպումը կանցկացնի՝ 2020 թվականի Եվրոպայի առաջնության ընտրական փուլում հյուրընկալվելով Լիխտենշտեյնին: 6-րդ տուրից հետո մեր հավաքականը J ենթախմբում 3-րդն է և ընդամենը 3 միավորով է զիջում 2-րդ հորիզոնականում գտնվող Ֆինլանդիային:
Հիշեցնենք, որ ընտրական խմբերում առաջին և երկրորդ հորիզոնականները զբաղեցրած երկու հավաքականները անմիջապես իրավունք են ստանում մասնակցելու եզրափակիչ փուլին: Այսինքն՝ մեր հավաքականն ունի բացառիկ հնարավորություն ընտրական ենթախմբից, առանց անցումային հանդիպումներ անցկացնելու, հայտնվելու Եվրո-2020-ում:
Մեր երկրում, ոչ միայն երկրպագուների շրջանում, արդեն իսկ սկսվել է ֆուտբոլային տենդը, որը կավարտվի միայն հոկտեմբերի 15-ին: Այդ օրը Հայաստանի հավաքականը կմրցի Ֆինլանդիայի ընտրանու հետ: Ֆուտբոլասերներից յուրաքանչյուրը վերջին օրերին հաշվարկի միջոցով փորձում է հասկանալ, թե որ դեպքում մեր հավաքականը կամրապնդվի երկրորդ հորիզոնականում և հաստատուն քայլ կկատարի դեպի եզրափակիչ փուլ:
Լիխտենշտեյնի և Ֆինլանդիայի հետ հանդիպումներից առաջ փորձենք հասկանալ, թե որ արդյունքները մեզ համար առավել նպաստավոր կլինեն: Սկսենք ամենակարևորից: Այս պահին առաջնայինը Լիխտենշտեյնի հետ մրցավեճում 3 միավոր վաստակելն է: Հիշեցնենք, որ հունիսին Երևանում կայացած մրցավեճում Հայաստանի հավաքականը Լիխտենշտեյնի նկատմամբ առավելության էր հասել 3:0 հաշվով՝ տոնելով ընտրական մրցափուլում առաջին հաղթանակը:
Հոկտեմբերի 12-ին Ֆինլանդիան մրցակցի հարկի տակ մրցելու է Բոսնիա և Հերցեգովինայի հետ: Եվրո-2020 ընտրական մրցաշարի կանոնակարգի համաձայն՝ եթե ընտրական խմբում երկու թիմեր հավաքում են հավասար միավորներ, առաջինը հաշվի են առնվում տվյալ թիմերի միջև անցկացրած հանդիպումների արդյունքները: Մասնավորապես, նախապատվությունը տրվում է մրցակցի հարկի տակ ավելի շատ գոլ խփած հավաքականին: Հայաստանը Ֆինլանդիային սեփական հարկի տակ զիջել է 0:2 հաշվով, ինչը նշանակում է, որ պատասխան մրցավեճում մեզ համար ամենանպաստավոր արդյունքը խոշոր հաշվով կամ գոնե 3:1, 4:2 հաշվով հաղթանակը կլինի: 2:0 հաշվով հաղթելու դեպքում հաշվի կառնվի խփած և բաց թողած գնդակների տարբերությունը: Բնական է, որ սա այնքան էլ ցանկալի տարբերակ չէ մեզ համար՝ հաշվի առնելով, որ վերջին երկու հանդիպումներում մրցելու ենք Հունաստանի և Իտալիայի հետ:
Մեզ համար խիստ կարևոր է նաև, որ Բոսնիան սեփական հարկի տակ հաղթի ֆիններին։ Եթե առաջիկա երկու հանդիպումներում վաստակենք 6 միավոր և Ֆինլանդիային հաղթենք խոշոր հաշվով, ապա նոյեմբերին Երևանում Հունաստանին հաղթելու դեպքում վերջին տուրից առաջ կնվաճենք Եվրո-2020-ի ուղեգիր: Վերջին տուրում եթե նույնիսկ պարտվենք Իտալիային, իսկ Ֆինլանդիան հաղթի Հունաստանին, մեր հավաքականը կմնա 2-րդ հորիզոնականում, քանզի լրացուցիչ առաջին ցուցանիշով առավելություն կունենա սկանդինավյան հավաքականի հետ:
Շատերը հավանական են համարում նաև այս տարբերակը: Մենք հաղթում ենք Լիխտենշտեյնին, այնուհետև Ֆինլանդիայի նկատմամբ առավելության ենք հասնում մեկ գնդակի տարբերությամբ, իսկ ֆինները մեզ հետ խաղից առաջ ոչ-ոքի են խաղում Բոսնիայի հետ։ Իրադարձությունների նման զարգացման պարագայում կունենանք երկու միավորի առավելություն Ֆինլանդիայի նկատմամբ: Այս դեպքում մեզ անհրաժեշտ կլինի վերջին երկու հանդիպումներում ևս վաստակել 6 միավոր: 4 միավոր վաստակելու դեպքում ըստ ամենայնի կհավասարվենք ֆինների հետ, սակայն լրացուցիչ ցուցանիշով կհանգրվանենք 3-րդ հորիզոնականում:
Նշենք, որ վերջին երկու տուրերում Ֆինլանդիան մրցելու է Լիխտենշտեյնի և Հունաստանի հետ: Հավանականությունը մեծ է, որ այս մրցավեճերում ֆինները կվաստակեն 6 միավոր: Մեզ համար ամենաանցանկալի զարգացումը կլինի թերևս Ֆինլանդիայի հաղթանակը Բոսնիայի նկատմամբ: Այդ պարագայում մեզ ուղղակի անհրաժեշտ կլինի հաղթել Ֆինլանդիային գոնե երկու գնդակի տարբերությամբ: Այդ դեպքում մենք միավորների քանակով կհավասարվենք և ստիպված կլինենք հույների և իտալացիների հետ հանդիպումներում պայքարել 6 միավորի համար: Լիխտենշտեյնի և Ֆինլանդիայի հետ մրցավեճերում նույնիսկ 4 միավոր վաստակելու դեպքում մեր հավաքականը գործնականում կկորցնի հնարավորությունը 2-րդ հորիզոնականը զբաղեցնելու: Ուստի առաջին հանդիպումներում մեր հավաքականի միավորներ կորցնելու պարագայում հնարավորությունների մասին խոսելն ուղղակի պատեհ չենք համարում:
Նշենք, որ հոկտեմբերի 12-ին Հունաստանին հաղթելու դեպքում Իտալիան կունենա 21 միավոր և ընտրական փուլի ավարտից 3 տուր առաջ կնվաճի եզրափակիչ փուլի ուղեգիր: Հունաստանն իր հերթին վաղուց է կորցրել հնարավորությունը երկրորդ հորիզոնականի համար պայքարելու: Ենթադրվում է, որ վերջին հանդիպումներում թե Իտալիան և թե Հունաստանը մոտիվացված չեն լինի: Բայց այս մասին խոսելը դեռ վաղ է: Առջևում Լիխտենշտեյնի հետ հանդիպումն է, և մեր գլխավոր նպատակն այս պահին առաջին քայլում երեք միավոր վաստակելն է: