Այսօր ՀՀ Ազգային Ժողովի նախագահ Արարատ Միրզոյանի նախաձեռնությամբ տեղի են ունեցել փաստահավաք խորհրդարանական լսումներ՝ «Պետության կողմից «Հյուսիսային պողոտա-Կասկադ» ծրագրով բացառիկ գերակա հանրային շահ ճանաչելու հետեւանքով սեփականության իրավունքի ոտնահարման խնդիրները» թեմայով: «Առաջին լրատվական»-ի հետ թեմայի շուրջ զրուցում փաստաբան Տիգրան Եգորյանը մասնավորապես նշեց. «Այս կոնցեպտը, որը հանրությանը մատուցվեց հանրային գերակա շահի անվան տակ, ի սկզբանե, այսպես ասած, ակումբային շահեր սպասարկող ծրագիր էր, որի իրագործումն ապահովվեց իշխանության բոլոր թևերի՝ ԱԺ-ի, կառավարության և դատարանների մասնակցությամբ: Այս մեխանիզմն արդյունավետորեն գործեց, որի հետևանքով Երևանի կենտրոնի բնակիչները սեփականազրկվեցին՝ ի շահ այդ կոռուպցիոն ծրագրի»:
Փաստաբանի հավաստմամբ՝ բոլոր այն իրավաբաններն ու փաստաբանները, ովքեր հանդգնում էին ունեզրկված անձանց շահերը պաշտպանել, արժանանում էին շինծու մեղադրանքների, ընդհուպ մինչև կալանավորման:
Տիգրան Եգորյանի կարծիքով՝ ունեզրկված քաղաքացիների փոխհատուցման խնդրի լուծման համար իշխանության կողմից պետք է համակարգային գործողություններ իրականացվեն, որոնք կարող են թեթևացնել պետության բեռը, հետևաբար մեր բյուջեի վրա ընկնող բեռը՝ «ի հաշիվ այդ հանցագործությունների համար պատասխանատուների վրա բեռը դնելու»:
Անդրադառնալով Հրայր Թովմասյանի պաշտոնանկության վերաբերյալ «Իմ քայլի» նախաձեռնությանը՝ Տիգրան Եգորյանը կարծիք հայտնեց, որ այս նախաձեռնությունը Ազգային ժողովին բարդ կացության մեջ դրեց, որը հարվածի տակ դրեց ինչպես վարչապետի և ԱԺ-ի կողմից տրված գնահատականները, այնպես էլ ԱԺ-ի կողմից ընտրված ՍԴ դատավորի նամակով տրված գնահատականները… «Այդ քննարկումների ընթացքում կարևորում եմ պատգամավոր Արման Բաբաջանյանի հայտարարությունը, որի կապակցությամբ ԱԺ «Իմ քայլը» խմբակցության ղեկավար Լ. Մակունցը հայտարարեց, որ իրենց համար ընդունելի և քննարկելի են բոլոր հնարավոր իրավական և արդյունավետ լուծումների առաջարկները»: Փաստաբանի խոսքով՝ ԱԺ կողմից ՍԴ ուղարկված դիմումը անհեթեթ հետևանքներ է առաջացնելու. «Այդ դիմումի վրա որևէ խարիսխ չկա: Առանց սպասելու այս դիմումի որևէ ընթացքի՝ պետք է առաջնահերթ օրակարգում գտնվի համակարգային լուծումների աշխատանքը, որը, իմ դիտարկմամբ՝ մեկնարկված է և ընթացքի մեջ է»:
Մանրամասն՝ տեսանյութում:
