Այսօր մեկնարկել է Մարտի 1-ի գործով նախկին նախագահի և ևս երեք պաշտոնյաների դատաքննությունը: Ռոբերտ Քոչարյանի աջակիցներն այսօր հանդես են եկել հայտարարությամբ՝ կոչ անելով ազատել նախկին նախագահին: Թեմայից բխող հարցերի շուրջ «Առաջին լրատվական»-ի հետ քննարկմանը մասնակցեցին քաղաքագետ Ռուբեն Մեհրաբյանը, «Անտարես» հրատարակչության տնօրեն Արմեն Մարտիրոսյանը և վերլուծաբան Գոռ Մադոյանը:
«Ցավալի է, որ Հայաստանում կարող էր նման փաստաթուղթ գրվել և ստորագրվել»,- անդրադառնալով Ռ. Քոչարյանի աջակիցների հայտարարությանը՝ նշեց Ռուբեն Մեհրաբյանը՝ հավելելով, որ գոնե վերջին 20 տարիներին Հայաստանում բնակված մարդու ձեռքը չպետք է գնար այդպիսի «թուղթ» գրել և ստորագրել: «Այդ ցուցակում տեսա անձանց, որոնք Քոչարյանի մասին հակառակ կարծիք են ունեցել, անձանց, որոնք անտարբեր են եղել, ակտիվ քաղաքացիական դիրքորոշում չեն ունեցել, և այդ ցանկում է նաև Զորի Բալայանը, նրա հետ կապված՝ կարող եմ ասել, որ ներքաղաքական հարցերում ինչին դեմ է Զ. Բալայանը, ես կողմ եմ ապրիորի»,- նշեց քաղաքագետը:
Գոռ Մադոյանի գնահատմամբ՝ այս փաստաթուղթն ավելի շատ նախերգանքի նման է, Քոչարյանի պաշտպանական թիմը հայտարարել է, որ դիմելու են ՄԻԵԴ, երևի թե փորձ է արվում որոշակի ֆոն ստեղծել, որ ամբաստանյալ Քոչարյանը հանրային աջակցություն ունի: «Կարդալով ստորագրողների ցանկը՝ կարելի է տեսնել, որ խնամի- ծանոթ-բարեկամներ են: Այս խմբակն իրականությունից կտրված է և չի փորձում առերեսվել իրականության հետ»,- նշեց վերլուծաբանը:
Արդյո՞ք այս հայտարարությունը վկայում է այն մասին, որ ինչ-որ նոր զարագացման հետ գործ ունենք: Ի պատասխան այս հարցի՝ Արմեն Մատիրոսյանը նշեց. «Երբ որ իշխանության է գալիս ժողովուրդը, սկսում է նախկինում մեղք գործած մարդկանց ի հայտ բերել և թույլ չտալ, որ պետական ապարատում ծառայեն: Հայաստանում ինքնալյուստրացիա է կատարվում, վաղը հանգիստ կարելի է ասել, որ ովքեր այդ ստորագրողների ցուցակում են, այլևս իրավունք չունեն պետական ապարատում ծառայել»:
Անդրադառնալով դիտարկմանը, որ վերոնշյալ հայտարարության մեջ նշված է. «Եթե չսթափվեք, հայկական երկու պետությունների անվտանգությունը լուրջ սպառնալիքի տակ է հայտնվելու»,- Ռուբեն Մեհրաբյանն ընդգծեց. «Իրական սպառնալիքն այն է, որ դեռևս չկա Քոչարյանի դատավճիռը: Երկրի սպառնալիքները չեզոքացնելու կարևորագույն միջոցառումներից մեկը սահմանադրական կարգը տապալած խմբավորմանը և նրա ղեկավարին քրեական պատասխանատվության ենթարկելն է»:
Գոռ Մադոյանը հավելեց, որ Քոչարյանն իրեն միշտ նույնացրել է պետության հետ և դրանով է նաև պայմանավորված, որ նա չի ընդունում, որ սահմանադրական կարգ է տապալել՝ «ինչպես կարող եմ ես ինձ տապալել» տրամաբանությամբ. «Այդ նյութի հեղինակները նույն տրամաբանությամբ Քոչարյանին նույնացրել են հայկական երկու պետականությունների հետ»:
Վերլուծաբանի կարծիքով՝ Քոչարյանի աջակիցների կողմից անօրինական քարոզչություն է ընթանում, «որը բնում պետք է խեղդվի»:
Մանրամասն՝ տեսանյութում: