Սերժ Սարգսյանը, ինչպես փոխանցում են իշխանությանը մոտ կանգնած թերթի աղբյուրները, վարչապետ Տիգրան Սարգսյանին սպառնացել է, որ վերջինս հրաժեշտ կտա պաշտոնին, եթե առաջիկայում «Ֆորբս» ամերիկյան հեղինակավոր ամսագիրը չհերքի Հայաստանի վերաբերյալ հրապարակումը:
««Ֆորբսի» «Աշխարհի վատագույն տնտեսություններ» վարկանիշային աղյուսակում, որ հրապարակվել անցյալ շաբաթ, Հայաստանը հայտնվել էր երկրորդ տեղում Մադագասկարից հետո: Մեր աղբյուրները փոխանցում են, որ Սերժ Սարգսյանի սույն զգուշացումից հետո Տիգրան Սարգսյանը «խառնել» է դրսի իր բոլոր կապերը: Արդյունքը եղել է ընդամենը այն, որ «Ֆորբսի» վերոնշյալ հրապարակման հեղինակ Դանիել Ֆիշերն ամսագրի կայքի (www.forbes.com) մեկնաբանությունների բաժնում գրել է, թե հույս ունի, որ հաջորդ տարի Հայաստանն այդ ցուցակից դուրս կգա»:
Թերթի աղբյուրները, սակայն, փոխանցում են, որ Սերժ Սարգսյանն ասել է, թե սույն մեկնաբանությունն իրեն չի բավարարում, և հրապարակումը պետք է հերքվի՝ վարչապետին զգուշացնելով, որ վերջինիս բացատրություններն այլևս չեն անցնելու։
«Ուշագրավ է, որ անցյալ շաբաթ էլ Ազգային ժողովի նախագահ Հովիկ Աբրահամյանը Շիրակի մարզ կատարած այցելության ժամանակ, անդրադառնալով «Ֆորբսի»՝ Հայաստանում մեծ աղմուկ առաջացրած հրապարակմանը, ասել էր, թե վարչապետը պետք է արձագանքի այդ տեղեկատվությանը: Եթե այն համապատասխանում է իրականությանը, ասի, որ համապատասխանում է, իսկ եթե ոչ, ապա անհրաժեշտ է հերքել: Վարչապետը, սակայն, առ այսօր հրապարակայնորեն չի արձագանքել այդ հրապարակմանը»,- հավելում է «ՀԺ»-ն: