«Հայաստանը նոր է մտնում այսպիսի մեծ կոնֆերանսների աշխարհագրության մեջ, և պետք չէ սպասել, որ աշխարհի բոլոր ղեկավարները իրենց գործերը կթողնեն և կգան այստեղ, բայց մեկ, երկու, երեք՝ եթե լավ գնա, միգուցե արդեն հերթ կկանգնեն այստեղ գալու համար: Սակայն կարծում եմ, որ ներկայացուցչության առումով բավականին ազդեցիկ կազմ է»,- «Առաջին լրատվական»-ի հետ զրույցում ՏՏ համաշխարհային համաժողովի մասին իր տպավորությունները հայտնեց Տեղեկատվական անվտանգության մասնագետ Սամվել Մարտիրոսյանը:
Նա կարևորում է, որ այս ամենը կարողանանք մեդիա-դաշտում դուրս տանել. «Ամենահետաքրքիր մասն անցնում է կուլուարներում՝ կապեր են հաստատվում»:
«Հայաստանը շատ հետաքրքիր երկիր է՝ և՛ լավ, և՛ վատ առումով: ՏՏ ոլորտը մեզանում շատ մեծ թափ է առել՝ տարեկան 20-30 տոկոս աճ ունի, և երևի թե միակ ոլորտն է, որը միշտ է աճում՝ անկախ տնտեսական իրավիճակից: Սակայն հասարակության մեկ այլ հատված բացարձակապես ներգրավված չէ և չի էլ հասկանում, թե ինչի մասին է խոսքը»,- ասաց Սամվել Մարտիրոսյանը:
Տեղեկատվական անվտանգության մասնագետի խոսքով՝ ՏՏ ոլորտը որքան արագ աճի, այդքան կարող է ինքն իրեն թաղել. «Որովհետև մենք այդքան մասնագետ չունենք. այսօր կրթական համակարգը և ՏՏ ոլորտը իրար հետ գրեթե կապ չունեն»:
Առավել մանրամասն՝ տեսանյութում:
